02.08.2023 Скопје
Првите воени авиони кои евакуираа главно европски граѓани од Нигер по воениот удар, рано изутринава слетаа во Париз и Рим.
Поради ризикот од ескалација на конфликтот, Франција, Италија и Шпанија потврдија дека евакуацијата ќе се врши по воздушен пат. Прво, францускиот авион го напушти Нигер синоќа и рано изутринава слета во Париз со 262 патници.
Италијанците и другите странски државјани кои го напуштија Нигер, безбедно слетаа во Рим, исто така соопшти вицепремиерот и министер за надворешни работи на Италија, Антонио Тајани.
Претходно, самиот Тајани најави полетување на специјалниот лет од Ниамеј, главниот град на Нигер, со италијански и странски државјани кои одлучија да ја напуштат африканската земја.
Безбедното враќање на 99 патници, Италијанци и странци, кои го напуштија Нигер е резултат на соработката меѓу Министерството за надворешни работи и меѓународна соработка и Министерството за одбрана.
„Му благодарам на персоналот на Здружената оперативна команда (COVI) за совршената координација на операцијата“, истакна италијанскиот министер Крозето.
Подготвено од М.Н.
About Author
