14.08.2023 Скопје
Републичката пазарна инспекција констатирала неправилности при секоја трета контрола на туристичките агенции во текот на јули.
Од Инспекторатот на Република Српска потсетуваат дека со оглед на тоа што сезоната на годишни одмори е во тек, практика е пред почетокот и во текот на сезоната да се вршат засилени контроли на овие агенции.
Како што посочуваат, примарна цел на овие контроли е деловното работење на агенцијата да се води согласно законот, што директно ги засега корисниците на овие услуги и нивните права кои произлегуваат од договорите склучени со агенцијата.
Во изминатиот месец, како што прецизираат од Инспекторатот на Република Српска, извршени се 26 контроли на туристички агенции, од кои кај девет биле констатирани неправилности.
„Врз основа на ова донесени се седум решенија за отстранување на неправилности и издадени се четири прекршочни налози со вкупна вредност од 10.000 КМ. Утврдените пропусти се однесуваат на несовремена деловна евиденција, изготвување поединечни договори и патни исправи со корисници на услуги, водење евиденција на договори склучени со трети лица и водење евиденција на договори за продадени поединечни туристички аранжмани-аранжмани или екскурзии“, велат од Инспекторатот на Република Српска.
Од Инспекторатот на Српска велат дека кога станува збор за контрола на туристичките агенции, приоритет е да се утврди дали имаат лиценца од Министерството за трговија и туризам на Република Српска, кое го овластува вршењето на активности на туристичка агенција. Понатаму, се проверува дали ги исполнуваат условите во однос на просторот, персоналот, осигурувањето, водење пропишана евиденција и друго.
„Во однос на заштитата на правата на потрошувачите, се проверува дали се јасно наведени цените на понудените аранжмани, дали програмите за патување се достапни за потрошувачите, дали агенцијата ги запознала корисниците на услугите со општите услови за патување, дали се издаваат фактури, дали корисниците на туристички аранжмани, склучуваат договори за организирање патување, дали им се издаваат патни исправи и други работи“, објаснуваат од Инспекторатот на Република Српска.
Инаку, Законот за заштита на потрошувачите на Република Српска предвидува дека туристичка агенција која ги врши работите на организатор на патување и туристичка агенција која посредува во организацијата на туристичко патување е должна да склучи договор со секој потрошувач на туристички пакет-аранжман во кој мора да се наведат сите потребни информации дефинирани со закон.
На потрошувачот мора да му биде доставен барем еден примерок од договорот и доколку агенцијата не го сторила тоа, потрошувачите треба да инсистираат да им биде доставена копија.
Во Република Српска ќе се зајакне инспекцискиот надзор на деловните субјекти кои работат во областа на туризмот, договорено е на средбата на министерот за трговија и туризам на Српска, Денис Шулиќ, со претставници на Туристичката организација, Републичката управа за инспекциски работи и даночната управа.
На средбата во Бања Лука беше констатирано дека ќе се интензивира мониторингот, имајќи предвид дека презентираните економски параметри не ги следат статистичките показатели во делот на растот на бројот на посетители на Република Српска како туристичка дестинација.
„Темата на состанокот беше наплатата на данокот на живеалиште и контролата на стопанските субјекти кои според пријавените показатели работат под прагот на економска исплатливост“, соопштија од Министерството за трговија и туризам на Српска.
Подготвено од А.Ѓ.
About Author
