ДЕНЕС ЗАПОЧНУВА НАЈГОЛЕМИОТ КАТОЛИЧКИ НАСТАН ВО СВЕТОТ

01.08.2023 Скопје

Денеска во Лисабон започнува најмасовниот католички настан во светот, светскиот Ден на младите.

Папата Франциск ќе се придружи на верскиот фестивал. Ова ќе му биде првото патување во странство по неодамнешната операција.

Вечерва во 19 часот ќе се одржи миса во паркот Едуард Седми и на истата се очекува дека ќе присуствуваат триста илјади луѓе.

Папата ќе пристигне во Лисабон утре за да учествува во неделата на верски, културни и празнични настани што се одржуваат на секои три години во различен град. Еден милион луѓе се очекува да присуствуваат на последната миса на папата во Лисабон во недела.

Светскиот Ден на младите, кој тие го нарекуваат „Католички Вудсток“, е дел од напорите на Ватикан да ги поттикне младите католици во време на растечки секуларизам и напуштање на Црквата поради свештеничката сексуална злоупотреба на децата.

Португалскиот премиер Антонио Коста денеска изјави дека ова е најголемиот меѓународен настан што го организирала неговата земја, а кој ќе донесе млади луѓе од целиот свет.

Во последните денови, многу доброволци, облечени во карактеристични жолти кошули со кратки ракави, можеа да се видат пред црквите во Лисабон, кои ги пречекуваат многуте аџии кои се собраа во градот.

Папата Франциск се очекува приватно да се сретне со жртвите на сексуална злоупотреба за време на неговата посета.

Извештајот објавен во февруари од независна комисија покажа дека португалските свештеници злоставувале најмалку 4.815 деца од 1950 година.

Истрагата заснована на сведочењата на повеќе од 500 жртви заклучи дека црковната хиерархија во Португалија „систематски“ се обидела да ја прикрие злоупотребата.

За посетата на папата се распоредени околу 16.000 припадници на безбедносните сили, цивилната заштита и медицинскиот персонал. Некои патишта и станици на метрото ќе бидат затворени, што ќе биде предизвик за градот од 550.000 жители преполн со туристи.

Светскиот Ден на младите во Лисабон е 16-то меѓународно издание на фестивалот, кој со текот на времето стана најголемиот собир на католиците во светот.