22.07.2023 Скопје
Седум големи американски технолошки компании се согласија да преземат чекори за да обезбедат соодветни безбедносни стандарди во однос на развојот на производи базирани на вештачка интелигенција, соопшти Белата куќа.
Компаниите Amazon, Anthropic, Google, Inflection, Meta, Microsoft и OpenAI официјално ќе ја објават својата посветеност за време на состанокот со претседателот на САД, Џо Бајден. Задоволни сме што ја преземаме оваа посветеност, како што прават и другите компании во индустријата, тоа е важен прв чекор во обезбедувањето одговорен развој на вештачката интелигенција, истовремено создавајќи модел што ќе го следат и другите земји, изјави Ник Клег, претседател за глобални прашања во Мета, кој во средата го објави Llama 2, јазичен модел од следната генерација, развиен со врвни техники за длабоко учење.
Администрацијата на Бајден, исто така, подготвува извршна наредба со цел да се воспостави соодветна регулаторна рамка за високотехнолошкиот сектор.
Компаниите кои ги развиваат овие нови технологии имаат должност да ја гарантираат нивната безбедност, се вели во соопштението од американското претседателство.
Според договорот, компаниите ќе треба да вршат периодични безбедносни тестови на нивните производи врз основа на вештачка интелигенција, вклучувајќи и независни експерти и споделување на заклучоците со соодветните влади.
Компаниите исто така ќе треба да ги откријат можностите и ограничувањата поврзани со овие производи, посветувајќи особено внимание на можните ризици. Понатаму, системите засновани на вештачка интелигенција ќе треба да се користат за да се решат предизвиците што го засегаат општеството како целина, како што се апликациите во медицинската област (особено во истражувањето на ракот) и борбата против климатските промени.
Подготвено од М.Н.
About Author
