18.07.2023 Скопје
Милиони луѓе се борат со екстремните временски услови ширум светот, топлотни бранови ја погодија јужна Европа, делови од САД, Кина и Јапонија, а може да биде уште потопло.
Температурите во јужна и источна Европа се очекува дополнително да растат, а на Сардинија прогнозата е 46 степени.
Во Грција поради пожари се евакуирани 1.200 деца од камповите за одмор, пожари имаше и на шпанскиот остров Ла Палма, а италијанските власти издадоа црвени предупредувања за 16 градови.
Највисоката температура досега забележана во Европа беше 48,8 степени Целзиусови на Сицилија во август 2021 година.
Податоците на Светската метеоролошка организација на Обединетите нации покажуваат дека високите температури со кои се бори Медитеранот би можеле да продолжат и во август. И Кина ја објави највисоката температура во историјата во неделата – 52,2 степени Целзиусови.
Шумски пожари беснеат и во американскиот југозапад, а температурата во Долината на смртта во Калифорнија достигна 53,9 степени Целзиусови во неделата.
Во Долината на смртта, највисоката температура досега забележана на Земјата била 56,7 степени Целзиусови.
СМО објави дека ваквите екстремни временски услови се „се почеста појава во нашата клима која се загрева“ и ја нагласува потребата да се намалат емисиите на стакленички гасови кои предизвикуваат климатски промени.
Поради пожарите во Грција не само што се евакуирани повеќе од илјада деца во Грција, туку стигнале наредби и до селаните заедно со добитокот да ги напуштаат домовите.
Пожарите во околината на Атина се проширија долж брегот каде има околу 17.000 локални жители и туристи.
Грчката полиција соопшти дека турист е изнесен од Акропол бидејќи му се слошило од жештините. Неколку други туристички места околу светата карпа на која се наоѓа Акропол беа отворени за туристи.
Грчкиот Црвен крст во последните денови обезбедува шишиња со вода, помагајќи им на сите на кои поради високите температури им се слоши.
Пожари избувнаа во четвртокот на 13 јули и во Хрватска, но еден ден подоцна беа локализирани. Гореле куќи и автомобили во Гребаштица на далматинскиот брег.
Италијанската метеоролошка служба соопшти дека Сардинија ќе биде во „епицентарот“ на топлотниот бран оваа недела.
„Температурите ќе го достигнат врвот помеѓу 19 и 23 јули, не само во Италија, туку и во Грција, Турција и на Балканот. Се очекува да се срушат неколку локални рекорди на топлина во овие области“, рече Џулио Бети, италијански метеоролог и експерт за клима.
Фелисити Хинтон (59) во Рим, главниот град на Италија, изјави дека високите температури во комбинација со големиот број луѓе го отежнуваат движењето низ градот, претворајќи го во „кошмар“.
Италијанските медиуми објавија дека 44-годишен работник сликал линии на пешачки премин во градот Лоди, во близина на Милано, пред да се онесвести од жештината. Тој бил пренесен во болница каде подоцна починал. Причината е топлотниот бран Керберо, кој така италијанското метеоролошко друштво го нарече по триглавото чудовиште од Дантеовиот пекол.
Италијанските синоптичари предупредуваат дека следниот топлотен бран – наречен Харон по фериботот кој испрати души во подземјето во грчката митологија – оваа недела повторно ќе ги потисне температурите над 40 степени Целзиусови. Неколку туристи веќе се онесвестија поради топлотен удар, како и Британец пред Колосеумот во Рим.
Шумски пожари избувнаа на шпанските Канарски острови во саботата наутро, принудувајќи најмалку 4.000 луѓе да се евакуираат и уништија 4.500 хектари земја.
Фернандо Клавихо, претседател на регионалната влада на Канарските острови, изјави дека се уништени најмалку 12 куќи, додавајќи дека за брзото ширење на пожарот придонесе „ветрот, климатските услови и топлотниот бран во кој живееме“.
Во меѓувреме, екстремни горештини и поплави се бележат и во југозападниот дел на САД. Топлотниот бран кој ја зафати Америка не стивнува, а речиси 40 градови ја забележаа највисоката температура во историјата.
Се очекува и Лас Вегас, град во Невада да го собори овој неславен рекорд, кој сега е на 47,2 степени Целзиусови.
Тешките временски услови им се закануваат на 110 милиони луѓе само во Америка, но топлотниот бран веќе е во тек низ јужна Европа, а шумските пожари се борат во Канада.
Научниците веќе подолго време предупредуваат дека климатските промени предизвикани од човековите активности ќе доведат до зачестена појава на екстремни временски услови. Во градот Ел Пасо, Тексас, температурата не се спуштила под 38 степени повеќе од еден месец, а нема знаци дека наскоро би можело да залади.
Во Феникс, Аризона, веќе 17 дена температурите се над 43 степени. И покрај тоа што во неделата беше облачно, температурата сепак достигна 45,5 степени.
Топлините нема да престанат наскоро, а надлежните предупредуваат дека ранливите групи, меѓу кои децата, трудниците и старите лица, се изложени на сериозен ризик од болести предизвикани од високите температури.
Јавните објекти во делови на Калифорнија и Невада се претворени во „центри за ладење“ каде луѓето можат да избегаат од жештините.
Среде екстремните температури во Долината на смртта, Метју Ламар, чувар на паркови, изјави дека температура од 56 Целзиусови степени не била постигната повеќе од 100 години.
„Сепак, тоа се случи во 2020 година, потоа во 2021 година“, вели Ламар, додавајќи дека тоа го очекувале и овој викенд. Тој наведува дека овие временски услови привлекуваат туристи кои сакаат да „доживеат екстреми“. Но, некои посетители рекоа дека не треба да се заборави фактот дека тоа се симптоми на климатските промени.
Светот веќе се загреа за околу 1,1 степени Целзиусови од почетокот на индустриската ера, а температурите ќе продолжат да растат доколку владите ширум светот не преземат драстични чекори за намалување на емисиите на стакленички гасови, предупредуваат експертите.
Подготвено од А.Ѓ.
About Author
