07.07.2023 Скопје
Јапонскиот нуклеарен регулатор денеска и даде одобрение на токиската енергетска компанија „Тепко“, која управува со уништената нуклеарна централа Фукушима, да почне да испушта повеќе од еден милион тони радиоактивна вода.
Одобрувањето од јапонскиот регулатор е последниот чекор потребен за започнување на тој процес.
Шефот на Меѓународната агенција за атомска енергија (МААЕ) Рафаел Гроси денеска изјави дека само еден или двајца членови од тимот од 11 меѓународни експерти кои одобриле испуштање на прочистена радиоактивна вода од Фукушима можеби се загрижени за процесот.
Гроси рече дека извештајот на меѓународните експерти е беспрекорно подготвен. Работната група формирана од МААЕ во 2021 година за да ја испита безбедноста на планот на Јапонија за ослободување на радиоактивна вода од објект уништен од цунами пред повеќе од една деценија вклучува членови од Аргентина, Австралија, Канада, Франција, Маршалските Острови, Јужна Кореја, Русија, Велика Британија, САД и Виетнам.
Меѓународната агенција за атомска енергија (МААЕ) во вторникот соопшти дека планот на Јапонија е одобрен бидејќи испуштањето на радиоактивна вода ќе има незначително влијание врз животната средина.
Владата на Јужна Кореја денеска соопшти дека се согласува со планот Јапонија да испушти прочистена радиоактивна вода од „Фукушима“.
Владата соопшти дека Сеул извршил сопствена проценка на процесот и заклучила дека радиоактивниот материјал ги исполнува меѓународните стандарди за испуштање во океанот.
Кина ќе забрани увоз на храна од околу една петтина од јапонските префектури поради безбедносни причини, соопштија денеска кинеската царина, повикувајќи се на јапонското испуштање на радиоактивна вода во океанот.
Кина е најголемиот купувач на јапонски морски плодови. Кинеската царина најави дека континуирано ќе ги следи радиоактивните материи за да се осигура безбедноста на храната увезена од Јапонија.
Кина со недели јавно изразуваше силно противење на планот на Јапонија да испушти прочистена радиоактивна вода од Фукушима во океанот.
Подготвено од А.Ѓ.
About Author
