17.07.2023 Скопје
Во рамките на музичката програма на фестивалот „Охридско лето“ вечерва (17 јули) во 21 часот ќе се одржи концерт на триото „Инвентио“ од Италија. На програмата ќе бидат изведени дела од Бах, Де Берио, С. Танејев и А. Дворжак.
Ова трио го сочинуваат Јулиа Беринскаја, прва виолина, Валентина Данелон, втора виолина и Ана Серова на виола.
„Јулија Беринскаја е родена во уметничко и музичко семејство. Нејзината брилијантна кариера како солист, камерен музичар и педагог ја носи во Италија, Холандија, Швајцарија, Франција, Германија, поранешна Југославија, САД, Израел, Русија и др, каде настапува со реномирани оркестри. Валентина Данелон е родена во 1985 година и дипломира виолина со почести на Конзерваториумот за музика во Кастелфранко Венето во класата на Мишел Лот. Од 2020 година заедно со Стефан Миленковиќ е уметнички директор на Меѓународниот фестивaл „Звуците на местата“ во Удине, Италија. Уникатна фигура на меѓународната сцена како солист и камерен музичар, виолистката Ана Серова добива посвети на дела од некои од најзначајните композитори на денешницата“, информираат од „Охридско лето“.
Подготвено од А.Ѓ.
About Author
