26.07.2023 Скопје
Во извештајот на Европската централна банка се наведува дека банките од еврозоната забележаа рекордна ниска побарувачка за деловни кредити во вториот квартал од оваа година, што сега е на најниско ниво во последните 20 години.
Кварталниот дел на ЕЦБ за банкарски заеми покажува дека нето-промената на индексот на побарувачка на кредити паднала за 42 поени, што е најниско од следењето на овие податоци.
Како што се наведува, тоа е директна последица на зголемувањето на трошоците за задолжување поради зголемувањето на каматните стапки на централните банки, кои на тој начин се обидуваат да ја зауздаат инфлацијата.
ЕЦБ се очекува да ја зголеми својата депозитна стапка за уште 25 базични поени (0,25 отсто) на 3,75 отсто во четврток.
ЕЦБ минатата година почна да ги зголемува каматните стапки кои беа нула, а инфлацијата во еврозоната се намали од максимални 10,6 отсто во октомври на 5,5 отсто во јуни.
Внимателноста во однос на економското опкружување, исто така, ги наведе банките да ги заострат условите за кредитирање, се вели во извештајот на ЕЦБ.
„Кумулативното нето затегнување од почетокот на 2022 година е значително, а резултатите од истражувањето дадоа рани индикации за значително слабеење на динамиката на кредитирање од минатата есен“, објави ЕЦБ.
Исто така, наведено е и дека е намалена побарувачката за потрошувачки и хипотекарни кредити.
„Повисоките каматни стапки, слабеењето на изгледите на пазарот на станови и ниската доверба на потрошувачите негативно придонесоа за побарувачката за станбени кредити“, заклучува ЕЦБ во своето истражување.
Подготвено од А.Ѓ.
About Author
