07.06.2023 Скопје
Српскиот претседател Александар Вучиќ, кој во Белград се сретна со специјалниот претставник на Европската унија за дијалог меѓу Белград и Приштина, Мирослав Лајчак и специјалниот пратеник на САД за Западен Балкан, Габриел Ескобар, изјави дека сака да верува дека делот од меѓународната заедница која има најголемо влијание врз Приштина, има и механизми кои можат да доведат до конечно реализирање на обврските што Приштина ги прифати и потпиша пред повеќе од една деценија.
„Реков дека е време Приштина конечно да ги исполни своите обврски, а пред се формирање на Заедницата на српските општини во согласност со Бриселскиот договор“, напиша Вучиќ во објавата на Инстаграм.
Тој потсети дека Србија од првиот ден беше конструктивен, доследен и доверлив партнер во сите процеси кои ќе доведат до зачувување на стабилноста на целиот регион.
Претходно Лајчак и Ескобар ја посетија Приштина. Во текот на вчерашниот ден разговараа со претставници на Српската листа, а претходно и со претседателот на самопрогласеното Косово, Вјоса Османи, како и со албанските опозициски партии.
Лајчак и Ескобар разговарале за ситуацијата на Косово и Метохија со премиерот на привремените институции на Приштина, Албин Курти.
Лајчак по разговорот со Курти изјави дека на Приштина и биле изнесени три барања – деескалација на ситуацијата на северот на Косово и Метохија, брзо одржување на нови избори и враќање на дијалогот.
Тој изјави дека со Курти не е постигнат договор за одржување на избори на северот на Република Косово.
Ескобар изјави дека Курти има два дена да одговори на барањата на ЕУ и САД.
Подготвено од А.Ѓ.
About Author
