23.06.2023 Скопје
Воздушните вежби „Air Defender 2023“, кои НАТО ги одржа во централна Европа и Балтикот од 12 јуни до вчера вечерта, беа „целосен успех“, изјави началникот на Генералштабот на германското воздухопловство (Луфтвафе), воздухопловниот генерал Инго Герхарц, кој ги предводеше маневрите.
„Air Defender 2023“ покажа дека членките на Атлантската алијанса се способни да пренесат големи количини воен материјал за неколку дена и можат да поддржат голема вежба од два недели. Началникот на Генералштабот на Луфтвафе додаде дека од две илјади летови планирани за време на „Air Defender 2023“, 1.800 биле извршени со „90 проценти усогласеност, максимална вредност за вакви големи вежби“.
Важна цел беше да се комбинираат авионите и системите на различни воздушни сили во мрежа на податоци. Во врска со ова, Герхарц призна дека ова не беше успех „првиот ден“ од маневрите, но потоа успеа. Генералот ја подвлече важноста на воената инфраструктура во Германија за НАТО и истакна дека е против затворањето на базите на Луфтвафе во Хон и Лехфелд, меѓу точките за полетување на „Air Defender 2023“. Според Герхарц, поради својата геостратешка, географска и геополитичка ситуација, Германија мора да се смета себеси за пол на Атлантската алијанса, способна да ги пречека своите сили и во воздух и на земја.
Со „Air Defender 2023“, НАТО ги одржа најголемите воздушни вежби од неговото основање во 1949 година. Во маневрите учествуваа 25 земји, вклучително и членки на Атлантската алијанса и нејзините партнери, на пример Шведска, со 10.000 војници и 250 авиони, од кои 70 од Германија и 100 од САД. Целта беше да се оптимизира и прошири соработката меѓу земјите-учеснички, како и да се покаже силата на НАТО.
Оперативното сценарио симулираше активирање на член 5 од Северноатлантскиот договор, т.е. вежбање колективна одбрана во случај на напад врз држава членка. Со оглед на централната позиција во НАТО, Германија го имаше водството на „Air Defender 2023“, што го сочинуваше центарот на операциите. Покрај Хон и Лехфедл, главни точки за полетување беа Јагел, Вунсторф и Спангдалем како и Волкел во Холандија и Часлав во Чешка.
Маневрите се одвиваа пред се на германското небо, во Чешка, во балтичките држави, во Полска и во Романија. Вежбата беше фокусирана на северна Германија, на Северното и на Балтичкото Море, со затворање на дел од воздушниот простор за цивилни авиони и беспилотни летала.
Подготвено од М.Н.
About Author
