28.06.2023 Скопје
На покана на германскиот канцелар Олаф Шолц, премиерот на Република Северна Македонија, Димитар Ковачевски денеска е во официјална посета на Берлин.
Во Владата на Германија, како што е најавно, е предвиден официјален пречек со државни почести, средба меѓу премиерот Ковачевски и канцеларот Шолц, заедничка прес-конференција на премиерите, како и работна билатерална средба и вечера на двете официјалните делегации.
Во состав на делегацијата која ја предводи премиерот Ковачевски, се и заменикот на претседателот на Владата задолжен за европски прашања Бојан Маричиќ, како и министерот за надворешни работи Бујар Османи.
Главниот фокус на разговорите, како што е најавено, ќе бидат билатералните односи и соработка меѓу Република Северна Македонија и Германија, кои оваа година одбележуваат 30 години од воспоставувањето на дипломатските односи.
Исто така најавено е и дека дополнителни теми на разговор ќе бидат и германската поддршка на македонскиот евроинтеграциски пат, реформскиот процес насочен кон исполнување на стандардите на ЕУ и други актуелни прашања од регионален и европски безбедносен аспект.
Премиерот Ковачевски во рамки на официјалната посета на Берлин ќе учествува на експертска дискусија во организација на фондацијата Фридрих Еберт (Friedrich Ebert Stiftung) и ќе има средба со претставници на здруженија на македонски иселеници во Берлин.
Подготвено од М.Н.
About Author
