08.06.2023 Скопје
Загадувањето од шумските пожари кои беснеат низ Канада со недели прекри големи делови од Северна Америка, каде што се издадени предупредувања за високоризичен квалитет на воздухот за повеќе од 55 милиони луѓе.
Чадот од пожарите ги прекри големите градови во Онтарио и Квебек, вклучително и Торонто и околните области. Чадот стигна до Њујорк и Конектикат, каде што квалитетот на воздухот беше класифициран како „нездрав“.
Голем дел од чадот доаѓа од Квебек, каде во моментов горат 160 пожари. Environment Canada го издаде своето најстрого предупредување за Отава, класифицирајќи го квалитетот на воздухот во канадскиот главен град како „многу висок ризик“ за здравјето на луѓето. Квалитетот на воздухот во Торонто и околните области е „висок ризик“.
Филаделфија денеска издаде црвен аларм и ги повика жителите да останат дома.
„Постарите, малите деца и бремените жени или оние со проблеми со срцето и белите дробови може да доживеат сериозни здравствени ефекти од изложеноста на чад“, рече Џејмс Героу, портпарол на Одделот за јавно здравје во земјата.
„За оние кои не се сметаат за чувствителна група, бараме од нив да избегнуваат напорни активности на отворено, како што се трчање или вежбање“, изјави тој.
„Ги замолуваме луѓето да избегнуваат непотребно време на отворено, но ако треба да бидат надвор, треба да носат маски и да влегуваат внатре колку што им треба“, додаде Героу.
Тој рече дека не се знае колку долго ќе трае црвеното предупредување или дали ќе биде сменето на пониско ниво на предупредување.
Предупредувања за квалитетот на воздухот се издадени и во делови од Масачусетс, Њу Хемпшир, Пенсилванија, Мериленд, Вирџинија.
Јавните училишта во Њујорк и Вашингтон ги откажаа активностите на отворено поради загадување.
Маршал Бурк, вонреден професор на Универзитетот Стенфорд, објави табела на Твитер што покажува дека настанот бил поголем по обем од кој било друг во изминатите 20 години во Њујорк.
Во моментов, 1.475 летови се одложени во САД.
Американската агенција за заштита на животната средина (ЕПА) го оцени квалитетот на воздухот во поголемиот дел од североисточниот дел на САД како „нездрав“, особено за луѓето кои веќе имаат респираторни проблеми.
Подготвено од А.Ѓ.
About Author
