19.06.2023 Скопје
На светските берзи односот меѓу еврото и доларот значително порасна, достигнувајќи највисоко ниво за повеќе од еден месец, откако Европската централна банка (ЕЦБ) ги зголеми каматните стапки и најави можност за дополнително заострување на монетарната политика.
Индексот на доларот, кој го покажува движењето на американскиот долар во однос на другите шест најважни светски валути, минатата недела падна за 1,2 отсто, на 102,25 поени, блиску до најниското ниво за еден месец.
Истовремено, односот на доларот и европската валута потона за 1,8 отсто, па цената на еврото достигна 1,0940 долари, што е највисоко ниво во последните речиси пет недели.
Сепак, вредноста на доларот порасна во однос на јапонската валута, за 1,7 отсто, на 141,80 јени.
Зајакнувањето на еврото е благодарение на зголемувањето на каматните стапки во еврозоната на највисоко ниво во последните 22 години.
Имено, Европската централна банка (ЕЦБ) повторно ги зголеми клучните каматни стапки за четвртина процентен поен.
Каматната стапка за рефинансирање на банките во иднина ќе биде 4 отсто, а на депозитите преку ноќ во банките 3,5 отсто. Од јули минатата година, ЕЦБ ги зголеми каматните стапки во еврозоната за четири процентни поени.
Инфлацијата се намалува, но ќе остане доста висока, повтори ЕЦБ во образложението за натамошното заострување на монетарната политика.
Дополнително, во новите прогнози, ЕЦБ значително ги зголеми проценките за инфлацијата, која ги исклучува цените и енергијата, годинава, од 4,6 на 5,1 отсто. Поради ова, претседателката на ЕЦБ, Кристин Лагард изјави дека каматните стапки најверојатно ќе бидат зголемени на состанокот во јули.
Од друга страна, челниците на американската централна банка одлучија да ги задржат каматните стапки непроменети, во опсег од пет до 5,25 отсто.
Сепак, прогнозите на првиот човек на ФЕД покажуваат дека до крајот на годината очекуваат уште најмалку две зголемувања на каматните стапки, во интервал од 5,50 до 5,75 отсто.
Благодарение на ова, индексот на доларот се проби над 104 поени во средината на неделата. Сепак, до крајот на неделата нагло падна бидејќи на пазарот преовладуваше мислењето дека ФЕД „блефира“.
Како што се намалуваат инфлациските притисоци во САД, а се намалува економскиот раст, се повеќе се шпекулира дека ФЕД нема да ги зголеми каматните стапки на нивото што го очекуваат нејзините лидери.
Подготвено од А.Ѓ.
About Author
