11.05.2023 Скопје
Украинскиот претседател Володимир Зеленски вети дека ќе го врати секој дел од територијата што Русија ја зеде од Украина, додека неговите војници од првата линија остварија територијални придобивки во Бахмут.
„Нема да оставиме ниту едно парче од нашата земја на непријателот – тиранијата нема да владее никаде“, рече Зеленски во своето ноќно видео обраќање.
„Мораме да ги вратиме слободата, безбедноста и Европа на целата украинска земја“, додаде тој.
Неговите изјави уследија неколку часа откако украинските војници, вклучени во тешки борби за контрола на источниот регион Доњецк, рекоа дека ги турнале руските војници до два километри на некои места во близина на Бахмут.
„Таму спроведуваме ефективни контранапади“, рече Олександр Сирски, командант на копнените сили на Украина.
Сирски рече дека единиците на руската платеничка група Вагнер во некои делови се заменети со единици на редовната руска армија.
„Овие помалку добро обучени единици сега се поразени“, рече тој, додавајќи дека битката за Бахмут продолжува.
Андриј Билецки, основачот на украинскиот баталјон Азов, на Телеграм изјави дека територијата е целосно ослободена од руски војници и дека најмалку две руски бригади се поразени и заробени. Како што напредуваа борбите, шефот на Вагнер, Евгениј Пригожин, изјави дека се плаши дека неговата единица ќе биде опколена во борбите околу Бахмут.
Подготвено од А.Ѓ.
About Author
