15.05.2023 Скопје
Во текот на вчерашниот ден на прес-конференција, лидерите на Демократскиот фронт, политичка коалиција во Црна Гора, соопштија дека Демократскиот фронт престанува да постои, а Движењето за промени ќе учествува самостојно на изборите.
Еден од лидерите на Демократскиот фронт, Андрија Мандиќ, изјави дека Демократскиот фронт донесе одлука конститутивните партии да тргнат по различни патишта кон иста цел, Црна Гора е помирена земја.
Лидерот на Движењето за промени, Небојша Медојевиќ, најави дека заедничка цел е српско-црногорското помирување во Црна Гора и ги демантираше информациите дека имало кавги меѓу лидерите на ДФ.
Тој рече дека ПзП ќе настапи самостојно на изборите и ќе има реформска програма.
Лидерот на Демократската народна партија (ДНП), Милан Кнежевиќ изјави дека кога ДФ започнала „големо историско патување“ пред 11 години, си поставила цел – безмилосна борба против Мило Ѓукановиќ и Демократската партија на социјалистите (ДПС).
Демократскиот фронт е политичка коалиција официјално основана во јули 2012 година, од Новата српска демократија предводена од Андрија Мандиќ, Движењето за промени предводено од Небојша Медојевиќ и група поранешни функционери на СНП предводени од Милан Кнежевиќ и Предраг Булатовиќ.
Во создавањето на Демократскиот фронт учествуваа и непартиски личности, меѓу кои и Миодраг Лекиќ, кој беше избран за прв претседател на ДФ, иако ја напушти во 2015 година.
Со текот на времето, во оваа коалиција се приклучија и некои други партии, општествени организации и истакнати поединци во Црна Гора, а подоцна некои членови на ДФ поднесоа оставки, па составот на коалицијата се менуваше неколку пати, но клучните фактори останаа.
Подготвено од А.Ѓ.
About Author
