10.05.2023 Скопје
Интерпол апелира до јавноста да помогне во идентификувањето на телата на 22 жени убиени во Германија, Холандија и Белгија во период од неколку децении.
Тие велат дека сакаат да ги решат оние „заборавени случаи“ на убиства на жени што се случиле пред 10, 20, 30, па дури и 40 години и ја започнале операцијата „Идентификувајте ме“.
Најстариот случај датира од октомври 1976 година, кога телото на непозната жена беше пронајдено на паркинг покрај автопат во Холандија, а последниот е од август 2019 година, а се работи за жена чие тело е пронајдено во градски парк во Белгија.
Националната полиција не ги идентификуваше жртвите и поради фактот што овие жени не потекнуваат од земјите каде што се убиени. За секоја од 22-те жртви, ќе бидат објавени фотографии направени со технологија за реконструкција на лицето и информации за тоа кога биле пронајдени телата, заедно со личните предмети пронајдени кај жртвите.
„Ако се сеќавате на пријател, член на семејството или колега кој ненадејно исчезнал, ве молиме погледнете добро и контактирајте ја националната полиција преку формуларот доколку имате какви било информации за исчезнатите“, се вели на веб-страницата на Интерпол.
Франсоа-Хавиер Лорен, шеф на базата на податоци за ДНК во Интерпол, изјави дека се претпоставува дека некои од убиените жени се од источноевропските земји.
„Можно е да се работи за жени кои отишле на туристичко патување, но можно е и да се жртви на трговци со луѓе“, рече тој.
„Случаите не се поврзани едни со други, но споделуваат меѓународен контекст“, додаде тој.
Подготвено од А.Ѓ.
About Author
