12.05.2023 Скопје
Инфлацијата на потрошувачките цени во Чешката Република дополнително се намали во април на најниско ниво за нешто повеќе од една година, главно поради забавувањето на растот на цените на прехранбените производи, иако таа сепак остана силна во целина, покажаа податоците на чешкиот завод за статистика.
Потрошувачките цени се искачија за 12,7% на годишно ниво во април, побавно од растот од 15,0% во март. Економистите очекуваа намалување на инфлацијата до 13,3%.
Понатаму, ова беше најниската стапка на инфлација од март 2022 година, кога цените се зголемија за истите 12,7%.
Вкупната силна инфлација во април во голема мера беше поттикната од порастот на комуналните трошоци од 17,6%, но темпото на раст е забавено од 20,1% во март.
Цените на храната и безалкохолните пијалоци пораснаа за 17,3% на годишно ниво во април наспроти скокот од 23,5% пред еден месец, а оние на рестораните и хотелите пораснаа за 17,5%.
Во меѓувреме, транспортните трошоци дополнително се намалија за 1,7% во април поради остриот пад на цените на горивото.
На месечна основа, потрошувачките цени се намалија за 0,2%, додека се очекуваше тие да пораснат за 0,4%.
Подготвено од А.Ѓ.
About Author
