02.05.2023 Скопје
Американската министерка за финансии Џенет Јелен предупреди дека американската влада би можела да остане без пари до 1 јуни доколку Конгресот не го подигне или суспендира плафонот на долгот.
За првпат во историјата, САД би се нашле во ситуација да не можат да го отплатат долгот, што би ги потресло глобалните финансиски пазари и би ја уништило довербата во САД како глобален деловен партнер.
Странските медиуми пишуваат дека достигнувањето на границата на долгот би значело дека американската влада повеќе не е во можност да позајмува пари.
Вчера министерката го повика Конгресот да дејствува „што е можно поскоро“ за да го реши ограничувањето од 31,4 трилиони долари.
Таа рече дека чекањето до последен момент за суспендирање или зголемување на лимитот на долгот може сериозно да им наштети на довербата на бизнисот и потрошувачите, да ги зголеми краткорочните трошоци за задолжување за даночните обврзници и негативно да влијае на кредитниот рејтинг на САД.
Претседателот Џо Бајден свика состанок на конгресните лидери за ова прашање за вторник, 9 мај.
Републиканците во Претставничкиот дом бараат драстично намалување на трошоците и укинување на некои од одлуките на Бајден, вклучително и неговата програма за простување студентски заеми и даночни кредити за зелена енергија.
Од друга страна, демократскиот претседател, кој инсистира на подигање на границата без услови, минатата недела рече дека ова прашање „не може да се преговара“, но тој е под зголемен притисок од бизнис групите да разговараат за предлозите на Републиканците.
Експертите предупредија дека неисполнувањето на обврските може да доведе до рецесија и зголемување на невработеноста и дека САД нема да можат да позајмуваат пари за да ги исплатат платите на државниот и воениот персонал, чекови за социјално осигурување или други обврски.
Министерството за финансии планира да го зголеми задолжувањето до крајот на кварталот што завршува во јуни, во вкупна вредност од околу 726 милијарди долари, околу 449 милијарди долари повеќе од планираното претходно оваа година.
Официјалните лица рекоа дека тоа делумно се должи на пониските од очекуваните приходи од данокот на доход, повисоките државни трошоци и пониското од очекуваното готовинско салдо на почетокот на кварталот.
Плафонот на долгот е подигнат, продолжен или ревидиран 78 пати од 1960 година.
Подготвено од А.Ѓ.
About Author
