20.04.2023 Скопје
Под мотото „Работниците се државата“, ССМ објави проглас за работнички протест на 1 Мај.
Протестот ќе започне од 12 часот пред зградата на ССМ, а од Сојузот ги повикаа сите работници и граѓани да им се придружат и да им дадат поддршка.
„Недозволиво е вработените во јавниот сектор да немаат право на регрес за годишен одмор како нивните колеги и колешки во приватниот сектор. Недозволиво е да биде погазено работничкото достоинство и правото на пристојно работно време како цивилизациска придобивка, со воведување на 60 часовна работна недела заради исполнување на желбите на газди, функционери и поединци“, наведуваат од ССМ.
1 Мај се одбележува во знак на почит кон жртвите на штрајкот што се одржал од 1 до 4 мај 1886 година во Чикаго, а на овој штрајк, организиран со цел воведување на осумчасовен работен ден, била употребена сила од страна на полицијата, при што имало и жртви.
Оттогаш, традиционално, на 1 мај секоја година во повеќе земји ширум светот се одржуваат демонстрации во знакот на одбележувањето на Меѓународниот ден на трудот.
Подготвено од М.Н.