04.04.2023 Скопје
Годишната стапка на инфлација во Турција се забави на 50 отсто во март, покажаа официјалните податоци, давајќи уште еден поттик за претседателот Реџеп Таип Ердоган пред изборите во мај.
Стапката на инфлација забави петти последователен месец од највисоко ниво од над 85 отсто, објави државната агенција за статистика.
Официјалната стапка изнесуваше 50,5 минатиот месец, што е намалување од 55,2 отсто во февруари.
Забавувањето беше предводено од падот на трошоците за увоз на енергија од Турција, покажаа бројките.
Но, аналитичарите предупредуваат дека зголемувањето на потрошувачките цени може повторно да почне да се забрзува доколку Турција радикално не ги промени своите економски политики.
Ердоган се обиде да се бори против инфлацијата со намалување на каматните стапки, спротивен пристап што го преземаат централните банки во другите земји.
Аналитичарите предупредуваат дека економијата може да почне да се загрева бидејќи владата обновува огромни делови од југоисточниот дел на Турција, кои беа погодени од силен земјотрес во февруари, во кој загинаа повеќе од 50.000 луѓе.
Економијата на Турција сега мора да ги апсорбира последиците од катастрофата која, според Светската банка, предизвика директна физичка штета од околу 34,2 милијарди долари — што е еквивалент на четири отсто од турскиот бруто домашниот производ во 2021 година.
Ердоган, кој ќе се обиде да го продолжи своето владеење во трета деценија на изборите на 14 мај, ја оцени штетата на 104 милијарди долари.
Официјалната стапка на инфлација во Турција ја доведуваат во прашање независните економисти од истражувачката група ЕНАГ, која проценува дека потрошувачките цени се зголемиле со годишна стапка од 112,5 отсто во март, што е намалување од 126,9 отсто во февруари.
Подготвено од А.Ѓ.
About Author
