19.04.2023 Скопје
Романија го регистрира најголемиот апсолутен пад на населението во последната деценија, со над еден милион жители, во ЕУ. Истовремено, областа Илфов-Букурешт е регион со најголем процентуален пораст на населението, над 40%, покажуваат податоците собрани од Евростат по генералниот попис на сите земји-членки на ЕУ.
Романија е на шестото место по население во ЕУ, со 19,05 милиони жители, а потоа следи Холандија (17,4 милиони). Петте најнаселени земји во ЕУ во 2021 година се Германија (83,2 милиони луѓе), Франција (67,9 милиони), Италија (59,0 милиони), Шпанија (47,4 милиони) и Полска (37,0 милиони), според податоците на Евростат.
Споредено со податоците од 2011 година, се чини дека населението најмногу се зголемило во апсолутна вредност во Германија (зголемување од над 3 милиони луѓе), додека најголема стапка на раст е забележана во Малта (24,5%). Во споредба со пред една деценија, најголем апсолутен пад е забележан во Романија, намалување од над еден милион луѓе, од 20,1 милиони на 19,05 милиони, додека Бугарија забележа најголем релативен пад на населението од 11,5%.
Во споредба со пописот на населението и домувањето од 2011 година, податоците од пописот 2021-2022 година покажуваат, генерално, пораст на населението во западниот и северниот дел на ЕУ и намалување на истокот и југот.
Во однос на регионалните варијации, најголем пораст на населението е забележан во регионот Илфов (+40%), германскиот регион Вартбургкрајс (+27%), Луксембург (+26%), малтешките региони Гозо и Комино и Францускиот регион Гајане (по 25%), како и во Малта (+24%).
Најголем пад на населението во споредба со 2011 година е забележан во регионите на Бугарија и Хрватска, каде во 18 региони е забележан пад на населението во опсег од -17% до -25%.
Меѓу земјите со средна големина според населението, Шведска (10,5 милиони) ја надмина Португалија (10,3 милиони). Малта (0,5 милиони), Луксембург (0,6 милиони) и Кипар (0,9 милиони) останаа најмалите земји на ЕУ, со помалку од еден милион жители.
На регионално ниво, најголем број жители е забележан во Мадридскиот регион (6,7 милиони луѓе), потоа во регионот на Барселона (5,7 милиони) и регионот на Рим (4,2 милиони). Во исто време, најмал број жители е забележан во шпанскиот регион Ел Хиеро (11.290), потоа во грчкиот регион Евританија (17.428) и во австрискиот регион Лунгау (20.164).
Прелиминарните резултати за 2021 година укажуваат на зголемување на населението во 16 земји на ЕУ, со најголеми промени забележани во Луксембург (+26%), Малта (+24%) и Шведска (+10%). Истовремено, населението се намалило во девет земји на ЕУ, а најголем пад е забележан во Бугарија (-11%), Хрватска (-10%), Латвија (-9%) и Литванија (-8%).
Според најновите демографски проекции објавени од Евростат, популацијата на ЕУ ќе се намали за 6% меѓу 1 јануари 2022 година и 1 јануари 2100 година, што значи 27,3 милиони луѓе помалку.
Евростат проценува дека популацијата на ЕУ ќе достигне врв од 453 милиони луѓе во 2026 година, пред да се намали на проценето ниво од 420 милиони луѓе во 2100 година.
Подготвено од А.Ѓ.
About Author
