14.03.2023 Скопје
Во новиот извештај на научните агенции на ЕУ се заклучува дека појавата на птичји грип ќе се зголеми во живинарскиот сектор заедно со повремени инфекции кај цицачите, но тоа претставува минимален ризик за луѓето.
Извештајот, побаран од Европската комисија, ја оценува еволуцијата на птичјиот грип, високо заразна вирусна болест која се јавува првенствено кај живината и дивите водни птици, од декември 2022 до март 2023 година. Автори на извештајот се Европскиот центар за превенција и контрола на болести (ECDC) и референтната лабораторија на ЕУ (EURL).
Минатата година Европа беше погодена со најлошиот бран на птичји грип досега, но студијата забележа намалување во споредба со „високата точка“ во ноември 2022 година.
Според извештајот, птичји грип е забележан кај домашни и диви птици во над 24 земји во Европа, со неочекуван број на детекции кај морски птици, главно галеби, во изминатите месеци.
Живинарскиот сектор може да биде изложен на поголем ризик во наредните месеци поради галебите, особено црноглавите галеби, кои се движат во внатрешноста на земјата за време на сезоната на парење.
ЕФСА препорачува превентивни стратегии во густо населените области со живина.
Франческа Балдинели, научен службеник во тимот за здравје на животните на ЕФСА, истакна дека подигањето на свеста кај сопствениците на фармите и практичарите може да помогне да се осигури дека сите промени во производствените циклуси или зголемената смртност ќе бидат навремено пријавени и постапени по нив.
За цицачите, студијата ги поврзува инфекциите со хранењето со заразени диви птици, со случаи пријавени кај неколку видови во Европа и Америка.
За да се намали ширењето на дивите и одгледуваните цицачи, EFSA и EURL препорачуваат проширување и зајакнување на надзорот во областите каде што е присутен вирусот, особено за американските визон и свињи.
Додека ECDC смета дека ризикот од инфекција кај луѓето останува низок во Европа, постои поголем ризик за работниците и луѓето во контакт со потенцијално заразени животни.
„Човечките инфекции со птичји грип се генерално ретки настани“, рече Корнелија Адлхох, главен експерт на ECDC за коронавирус и грип.
Сепак, птичјиот грип се смета за „тековна закана за човековото здравје што бара постојан мониторинг“ поради ризикот од ресортиман со други животински и човечки сезонски вируси на грип, според експертот.
Извештајот заклучува дека директниот контакт со заразени птици или контаминирана средина е најверојатниот извор на инфекција.
Затоа, треба да се користи соодветна лична заштитна опрема кога е во контакт со птици, а лицата изложени на заразени птици или цицачи треба да се тестираат и да се следат.
Европската комисија во февруари објави нови правила за усогласување на вакцинацијата на животните против птичјиот грип за да се спречи или контролира ширењето на болеста.
Новите правила, кои се усогласуваат со меѓународните стандарди на Светската организација за здравје на животните (WOAH, порано OIE), стапија на сила во неделата.
Сепак, сè уште не е јасно дали вакцинацијата ќе го попречи брзото ширење, бидејќи научната евалуација е во тек.
АВЕЦ, европскиот претставник на секторот за месо од живина, предупреди дека вакцините можат да бидат дел од стратегијата, но тоа не е единственото решение.
Во меѓувреме, AnimalhealthEurope, претставувајќи ги производителите на производи за здравје на животните во Европа, повика на евалуација од повеќе засегнати страни за користење на вакцини во одредени сезони за да се намали ризикот од епидемии кај живината.
Европската комисија ја задолжи ЕФСА да даде ажурирање за достапните вакцини за живина и да ги процени соодветните стратегии за вакцинација што треба да се спроведат до јули.
Дополнително, побара од ЕФСА до март 2024 година да го процени засилениот надзор, ограничувањата и мерките за ублажување на ризикот што треба да се применат во вакцинираните зони.
Подготвено од А.Ѓ.
About Author
