21.03.2023 Скопје
Претседателот на Турција, Реџеп Таип Ердоган, оцени дека разорните земјотреси што го погодија регионот во февруари само во неговата земја предизвикаа штета од околу 104 милијарди долари. Тој апелираше за помош од странство и изјави дека ниту една земја не е способна сама да се справи со ваква катастрофа.
Обраќајќи се на меѓународниот собир на донатори на помош и за Турција и за Сирија, кои исто така беа тешко погодени од катастрофата, Ердоган даде одредена идеја за огромните штети предизвикани од земјотресите на 6 февруари, велејќи дека планот на Турција е да обнови околу 319.000 домови следната година.
„Повеќе од 51.000 луѓе загинаа во земјотресите, повеќе од 105.000 се повредени. Според првичните податоци, штетата од земјотресот надмина 104 милијарди долари“, изјави Ердоган во Брисел.
Тој нагласи дека е апсолутно невозможно еден народ сам да се справи со криза од ваков обем.
„Никогаш нема да ја заборавиме солидарноста што ја покажаа сите наши пријатели во овие тешки денови“, рече Ердоган.
ЕУ понуди помош за покривање на мал дел од напорите за реконструкција по земјотресите, во кои загинаа повеќе од 50.000 луѓе.
Подготвено од А.Ѓ.
About Author
