28.03.2023 Скопје
Министерот за правда Кренар Лога во своето обраќање на Конференцијата „Подобрување на ефикасноста, транспарентноста и отчетноста на јавното обвинителство” истакна дека без видливост на работата и постигнатите резултати, без мерливи и квалитетни споредбени податоци кои се собираат и обработуваат, исто како во земјите членки на Советот на Европа и Европската унија, правдата ќе остане слепа и нема, а граѓаните нема да ја добијат уставно загарантираната заштита.
„Идните процеси на дигитализација, на отвореност и транспарентност за Јавното обвинителство се услов тоа да опстои. Во изминатиот период, иако со посредство и помош на нашите пријатели од меѓународната заедница беа организирани голем број обуки на луѓето од правосудството во земјата, а особено на судиите и јавните обвинители, отсуствува покривање на можеби најзначајниот дел од нивната работа а тоа е начинот на спроведување или имплементацијата на нивната независност и самостојност особено при спроведувањето на постапките и донесувањето на одлуките“, изјави Лога.
Лога ги повика јавните обвинители во иднина при спроведувањето на обуките да се стави акцент на самостојното, законитото непристрасното и објективното вршење на јавнообвинителската функција, истакнувајќи дека е „време да тргнеме напред и да го поправиме угледот и кај домашната и кај меѓународната јавност и институциите“.
Подготвено од А.Ѓ.
About Author
