01.03.2023 Скопје
Денеска во Скопје се одржува Вториот економски форум во организација на Делфи Економскиот форум и Грчката бизнис асоцијација. Во фокусот е просперитетот во време на пресврти.
Форумот го отвори премиерот Димитар Ковачевски, а најавено е учество на повеќе политичари меѓу кои и премиерите на Косово и Црна Гора, Албин Курти и Дритан Абазовиќ.
На панелот „Една година подоцна: Влијанието на руската агресија во Украина врз Југоисточна Европа“, заменик министерот за Европа и надворешни работи на Албанија, Артемис Мало и амбасадорите на Франција, Грција и Шведска ќе разговараат за влијанието на војната во Украина на национално и регионално ниво и за идни можните сценарија.
Вториот панел е „Следење на Самитот во Тирана: Пристапување на Балканот во Европската Унија“, на кој ќе се зборува за клучните точки од Самитот и нивното влијание врз иднината на регионот. Панелисти ќе бидат еврокомесарот Оливер Вархеји, Мартин Дворжак, заменик министер за надворешни работи на Чешка и евроамбасадорот Дејвид Гир.
Во попладневниот дел на конференцијата, на панелот „Инвестирање во инфраструктура и поврзување: Територијална кохезија, трансевропски мрежи: пат, железница, мостови, пристаништа и аеродроми“ ќе се обрати министерот за транспорт и врски Благој Бочварски, а на панелот „Жените во првите редови на одржливиот развој“ градоначалничката на Град Скопје, Данела Арсовска. Министерот за финансии, Фатмир Бесими, ќе учествува на дискусијата „Стратегии за одржување на економскиот раст во време на неизвесност“. На форумот ќе се зборува и за дигиталната трансформација и иднината на ИТ.
Подготвено од А.Ѓ.
About Author
