31.03.2023 Скопје
ЕУ треба силно да ја брани својата стратешка независност, за да можат односите меѓу Брисел и Пекинг да се развиваат на здрав начин, изјави кинескиот претседател Си Џинпинг.
„За односите меѓу Кина и ЕУ да се развиваат на здрав начин, неопходно е ЕУ силно да ја брани својата стратешка независност“, рече Си за време на средбата со шпанскиот премиер Педро Санчез.
Си посочи дека и Кина и ЕУ го поддржуваат мултилатерализмот, целите и принципите на Повелбата на ОН и мирното решавање на меѓународните спорови, објави кинеската централна телевизија.
Според него, двете страни треба да бидат партнери на патот кон модернизација и добри пријатели во заедничкото изнаоѓање решенија за глобалните проблеми.
Си истакна дека Кина е подготвена да го поддржи мултилатералниот дијалог и соработка со ЕУ врз основа на независност, меѓусебно почитување и профит.
Кинескиот лидер додаде дека се надева оти Шпанија ќе одигра активна улога во олеснувањето на дијалогот и соработката меѓу Кина и ЕУ.
Санчез вчера пристигна во дводневна посета на Кина, на покана на Си. Двајцата лидери денеска се очекува да разговараат за развојот на билатералните односи меѓу Шпанија и Кина, како и за конфликтите во Украина и изгледите за нивно мирно решавање.
Посетата на Санчез на Пекинг следеше непосредно по 50-годишнината од воспоставувањето дипломатски односи меѓу Шпанија и Кина.
Подготвено од А.Ѓ.
About Author
