07.03.2023 Скопје
Обилните дождови, кои беа обвинети за некои недостиг на храна во Австралија, исто така, дадоа поттик на извозот на земјоделски култури.
Се предвидува дека земјоделците во земјата ќе ја дочекаат својата највредна година досега. Според Австралиското биро за економија на земјоделството и ресурсите (АБАРЕС), се предвидува дека земјоделскиот извоз ќе достигне рекордни 75 милијарди долари во годината до крајот на јуни.
Војната во Украина ја зголеми цената на стоките, вклучително и пченицата, најголемиот земјоделски извоз во Австралија.
Џаред Гринвил од АБАРЕС истакна дека рекордните нивоа на производство се поттикнати од исклучителни услови за растење и високите цени на суровините. Воедно, додаде дека националното зимско производство на култури доведе до голем дел од овие резултати, при што зимските култури се проценуваат на нов рекорд од 67,3 милиони тони во 2022-2023 година.
Цените, како што истакна Гринвил, се зголемени и од сушите во другите големи извозници и војната во Украина, која беше главен снабдувач на житни култури, вклучително и пченица. Сепак, тој додаде дека се очекуваат посуви услови во следните месеци со олеснување на климатскиот феномен наречен Ла Ниња.
Во текот на последните неколку години, последователните периоди на Ла Ниња ги намалија глобалните температури и донесоа обилни дождови во земји како Канада и Австралија.
Како и земјите ширум светот, Австралија е погодена од проблеми со синџирот на снабдување со храна предизвикани од војната во Украина и пандемијата „Ковид-19“.
Производството на храна во Австралија, исто така, беше погодено од екстремни временски настани. На пример, големите поплави на источниот брег на земјата минатата година предизвикаа недостиг на свежо овошје и зеленчук.
Корисниците на социјалните мрежи објавија фотографии од марули кои чинат над 10 австралиски долари, три пати повеќе од вообичаената цена.
Во јуни, гигантот за брза храна KFC соопшти дека бил принуден да става зелка во своите хамбургери и обвивки во Австралија поради недостигот на зелена салата.
Подготвено од А.Ѓ.
About Author
