09.03.2023 Скопје
Денеска премиерот Димитар Ковачевски изјави дека земјата ги доби ветените 80 милиони евра поддршка од Европската унија за справување со енергетската криза.
На состанокот во Владата за буџетската поддршка на Еу, Ковачевски истакна дека овие средства се веќе достапни и ќе бидат искористени како дел од пакетот антикризни мерки во износ од над 760 милиони евра.
Според премиерот Ковачевски, грантот на ЕУ од 80 милиони евра е поддршка за субвенции на граѓаните за сметки за електрична енергија, поддршка за малите и средни претпријатија за одржување на континуитетот на бизнисот, како и за државни инвестиции во енергетска транзиција, обновливи извори на енергија и енергетска ефикасност.
Шефот на Делегацијата на ЕУ во Република Северна Македонија, Дејвид Гир, потсети дека во октомври минатата година, претседателката на Европската комисија, Урсула фон дер Лајен, во Скопје вети дека Унијата ќе обезбеди 80 милиони евра за борба против енергетската криза.
„Сега ја испорачавме. Во пракса, оваа поддршка ќе им помогне на граѓаните да се справат со барањата што се појавија како резултат на енергетската криза. Тоа значи да им се помогне на сите домаќинства да ги задоволат основните енергетски потреби. Особено на најранливите“, рече тој.
Оваа финансиска поддршка на ЕУ, според Гир, „значи одржување и работа на училиштата и болниците, како и помагање на малите бизниси да обезбедат производство на основни прехранбени производи“.
Тој посочи дека 80-те милиони се само дел од поширокиот пакет вреден една милијарда евра што ЕУ го подготви за целиот Западен Балкан, за борба против енергетската криза и за „зелена транзиција“.
„Голем дел од овие пари веќе се достапни за поддршка на инвестициите во транзицијата на зелената енергија, која станува се поитна“, рече Гир.
Подготвено од А.Ѓ.
About Author
