07.02.2023 Скопје
Српскиот претседател Александар Вучиќ е подготвен да распише предвремени избори во септември и да се кандидира за премиер затоа што е разочаран од своите социјалистички коалициски партнери, изјави тој на седницата зад затворени врати во понеделникот на неговата владејачка партија, пренесоа српските медиуми.
„Подготвен сум да излезам на избори, како кандидат за премиер, но нема да попуштам на уцените, од Западот, од социјалистите или од лажните десничари“, изјави Вучиќ, цитиран од весникот „Вечерње новости“, по седницата на неговата конзервативна националистичка партија СНС.
Според весникот, Вучиќ се чувствувал „сам“ за време на минатонеделната седница на парламентот посветена на прашањето за Косово, поранешната српска покраина која прогласи независност во 2008 година.
И Србија, кандидат за ЕУ од 2012 година, и Косово се под притисок на САД и ЕУ да постигнат сеопфатен договор за нормализација на односите доколку сакаат да ги унапредат своите надежи за членство во ЕУ. Србија е кандидат, додека Косово аплицираше за членство во декември 2022 година.
За време на дводневната седница на парламентот, која на моменти се закануваше да прерасне во насилство меѓу пратениците од власта и опозицијата, Вучиќ истакна дека „никогаш нема да го признае Косово“. Тој повтори дека од дипломатите му било кажано дека отфрлањето на последниот предлог на Западот, кој не е официјално објавен во јавноста, но е претставен на двете страни, ќе значи замрзнување на преговорите со ЕУ и инвестициите во Србија.
Сепак, на крајот, повеќето пратеници се согласија дека Србија не треба да ја признае независноста на Косово или да ја прифати нејзината кандидатура за членство во Обединетите нации, клучен елемент на предлогот.
Вучиќ во понеделникот на своите сопартијци им порача дека е разочаран од однесувањето на Социјалистичката партија (СПС) во собранието.
„Многу сум разочаран од однесувањето на социјалистите, кои беа некаде помеѓу, обидувајќи се да им угодат на сите“, рече тој. Исто така, истакна дека подобро е „да се стане опозиција отколку да се остави партиски и приватни интереси да управуваат со државата“.
Вучиќ веќе двапати беше премиер, од 2014 до 2016 и од 2016 до 2017 година, а шеф на државата од 2017 година, зацврстувајќи ја својата власт на чело на режимот кој набљудувачите го опишуваат како се поавтократски, со фрагментирана опозиција и се намалува бројот на независни медиуми.
Подготвено од А.Ѓ.
About Author
