09.02.2023 Скопје
Според портпаролот на Кремљ, Дмитриј Песков, можните испораки на борбени авиони од Велика Британија во Украина нема да го променат исходот од војната, туку само ќе ја „ескалираат и пролонгираат и ќе ја направат поболна“ за Украина.
За време на ненадејната посета на ОК во средата, украинскиот претседател Володимир Зеленски упати молба за повеќе тешко вооружување, вклучително и борбени авиони. И британскиот премиер Риши Сунак рече дека „ништо не е надвор од масата“ кога станува збор за обезбедување воена опрема за Украина.
Песков истакна дека развојот сведочи за „растечката вклученост на Велика Британија, Германија и Франција во конфликтот меѓу Русија и Украина“. Исто така, додаде дека можат само да изразат жалење и „да констатираме дека таквите акции водат кон ескалација, го продолжуваат конфликтот и го прават овој конфликт поболен за Украина“, истакнувајќи дека во основа овие акции на земјите нема да го променат исходот од конфликтот и нема да ја сменат траекторијата што „ја следи нашата земја во однос на постигнување на своите цели во рамките на специјалната воена операција“.
Зеленски денес зазеде поинаков пристап за време на говорот во Парламентот на ЕУ.
Украинскиот претседател се фокусираше на вредностите што Украина ги споделува со Европа, но конкретно не побара повеќе оружје како што побара во Лондон во средата.
Подготвено од А.Ѓ.
About Author
