13.02.2023 Скопје
Австрискиот канцелар Карл Нехамер на состанокот одржан на 9 февруари во Брисел, каде што неколку европски шефови на влади се осврнаа на прашањето за миграцијата, категорично рече дека треба да ја „повлечеме кочницата“ на илегалната миграција во ЕУ.
Според Ројтерс, австрискиот претседател алудираше на ѕид или ограда за заштита на Европа, што неизбежно потсетува на познатиот проект на Трамп на границата меѓу Мексико и САД.
Австрискиот канцелар во Брисел го бранеше својот став со тоа дека Европската унија треба да ги финансира ѕидовите на границите, нешто за што досега немаше помош. Нехамер истакна дека за тоа „ни требаат пари, без разлика дали го нарекувате ограда или гранична инфраструктура“.
Карл Нехамер, припаѓа на конзервативната австриска партија ÖVP. Политичарот јасно побара ѕидови и огради за заштита на ЕУ и преземање мерки против акутната бегалска криза. Чувство кое ретко се изразува толку јасно и резултираше со отфрлање на идејата од другите лидери на Европската унија.
Екстремната десница која владее во некои европски земји, претставена од Унгарецот Виктор Орбан и Италијанката Џорџија Мелони, поддржува градење ѕидови. Всушност, Орбан увери дека единствениот проблем со она што го изградил на границата на неговата земја е што „не е доволно високо“.
И покрај противењето на некои земји, во петокот, на 11 февруари, европската помош за изградба на овие огради и ѕидови слични на времето на Трамп беше одобрена на самитот што се одржа во Брисел за миграциската политика.
Непосредно пред почетокот на овој специјален совет на Европската унија за миграциска политика што се одржува во Брисел, Нехамер увери дека Европа е во акутна криза и дека затоа мора да се преземат јасни и брзи мерки.
Австрискиот канцелар, исто така, изјави дека заштитата на надворешните граници на ЕУ е неопходност, а не каприц.
Во однос на слободниот простор за патување во Европа, политичарот смета дека ако Европа не може да ги заштити своите граници, тогаш Шенген зоната ќе доведе до апсурд. Исто така, додаде дека неприфатливо е мигрантите кои поминуваат безбедни трети земји, исто така, без пречки да ги преминуваат надворешните граници на ЕУ.
Австрискиот лидер инсистираше дека празните фрази нема да бидат доволни. За Нехамер е јасно дека имиграцијата е закана и проблем кој има само едно решение: ѕидови и огради.
Наспроти ставот на австрискиот лидер, има и други лидери кои одбиваат да ја претворат имиграциската политика на Европската унија во фабрика за подигање огради и ѕидови.
Потпретседателот на Европската комисија, Жозеп Борел, истакна дека луѓето се движат затоа што во нивните земји нема иднина, нема мир, нема стабилност.
Дебатата во Европа е многу интензивна околу дилемата за брановите на миграција и бегалци кои пристигнуваат.
Како што се наведува во написот на Дојче веле: „Во 2022 година, имаше драматичен пораст на бројот на барања за азил во ЕУ. Според Европската комисија имало 924.000, во споредба со 630.000 во 2021 година“.
Канцеларот Олаф Шолц неодамна го коментираше ова во владина изјава во која повика на подобра контрола на надворешните граници на ЕУ.
Германскиот канцелар изјави дека секој што нема право „да остане тука мора да ја напушти Германија, затоа и ги намаливме правните пречки за протерување на криминалците и оние кои се опасни, кои го продолжија притворот до депортација“.
Јасно е дека миграцискиот притисок се смета за проблем и за социјалдемократскиот германски канцелар и за конзервативниот австриски канцелар, но тоа не значи дека и двајцата точно се согласуваат за политиките што Европската унија мора да ги следи (и финансира).
Австрија и уште седум други земји од ЕУ напишаа писмо до претседателката на Комисијата на ЕУ, Урсула фон дер Лајен и до претседателот на Советот на ЕУ, Шарл Мишел, во кое бараат што поскоро решение за подобра заштита на границите.
Како и да е, обидот со ѕидови да се запрат миграциските бранови предизвикани од војна или сиромаштија, обично не дава големи резултати. Тоа не функционираше во САД, а нема да работи ниту во Европа.
Подготвено од А.Ѓ.
About Author
