09.01.2023 Скопје
Италијанските возачи се соочуваат со зголемени цени на горивото, но владата, која ги одредува моментално многу високите акцизи и ДДВ, постојано покажува со прст кон шпекулирачките препродавачи.
Цената на бензинот, дизелот и ТНГ, сега 2,50 евра за литар на автопатот, е збир на нето трошоците за гориво, фиксната акциза и 22% ДДВ. Од јануари акцизата ќе достигне речиси 55 отсто од крајната цена со вклучен ДДВ за бензинот и дизелот.
Цените на горивата се зголемија од јануари, бидејќи централнодесничарската влада предводена од премиерката Џорџија Мелони не го обнови акцизниот попуст воведен од претходната влада на Марио Драги во март минатата година.
Во тоа време, Драги воведе попуст на акцизите за гориво за да ги намали цените на бензинот, дизелот, ТНГ и автомобилскиот метан. Со отстранувањето на попустот, кој државата ја чини милиони евра, цените автоматски пораснаа.
Се чини дека шпекулациите од трговците на мало резултираа со пораст на цените.
Заменик-премиерот и министер за транспорт Матео Салвини отворено зборуваше за шпекулациите за цените на бензинот, велејќи дека „ќе разговараме со премиерот“ за акцизите. „Има некој што мисли дека е паметен“, додаде тој за трговците на мало.
Во меѓувреме, министерот за Enterprise and Made in Italy, Адолфо Урсо повика на постојано следење на цените и најави дека следната недела ќе се сретне со здруженијата на потрошувачи.
Министерот за енергетска безбедност за животна средина Жилберто Пичето Фратин зборуваше за „шпекулации“ за цени над 2 евра за литар и најави владина интервенција за намалување на цените.
Извори од Министерството за економија потврдија за Анса дека уште во декември минатата година, министерот за економија Џанкарло Џорџети им наложил на финансиските власти да ја следат ситуацијата за да спречат шпекулации за цените на горивата на патиштата и автопатите. Следната недела треба да бидат објавени резултатите од проверките за да се утврдат причините за поскапувањето и кој е одговорен.
Фигиск, еден од синдикатите што ги застапува бензинските пумпи во Италија, ги нарече обвинувањата за надувување на цените на горивата „лажни вести“, тврдејќи дека поскапувањето точно одговара на зголемувањето на акцизата и ДДВ.
Според Фурио Труци, претседател на здружението за правата на потрошувачите Асутенти, цените на горивата во Италија се меѓу највисоките во Европа поради „ненормалното оданочување“ што им нанесува штета на италијанските возачи.
„Се прашуваме дали премиерката Мелони знае за овие бројки и дали има намера да интервенира за да избегне нова економска вонредна состојба која неизбежно ќе има тешки директни и индиректни ефекти врз семејствата и бизнисите“, додаде Трузи.
Подготвено од А.Ѓ.
About Author
