30.01.2023 Скопје
Рударскиот гигант Рио Тинто вели дека работи со властите за да се обиде да најде радиоактивна капсула која исчезна во Западна Австралија овој месец.
Од компанијата за Би-Би-Си изјавија дека признаваат дека ова е многу загрижувачко и жалат за алармот што го предизвика.
Куќиштето содржи мала количина на радиоактивен цезиум-137, кој може да предизвика сериозна болест доколку се допре. Беше изгубен помеѓу градот Њумен и градот Перт, на растојание од приближно 1.400 километри.
Сајмон Трот, извршниот директор на „Железна руда“ на Рио Тинто, изјави дека како што ги „поддржуваме релевантните власти, започнавме сопствена истрага за да разбереме како капсулата се изгубила при транзит“. Исто така, додаде дека како дел од истрагата, „ние тесно соработуваме со изведувачот за подобро да разбереме што тргна наопаку во овој случај“.
Компанијата соопшти дека капсулата го напуштила рудникот Гудаи-Дари во Западна Австралија на 12 јануари. Беше пријавено за исчезнато на 25 јануари.
Според информациите, Рио Тинто ангажираше трета страна изведувач, со соодветна експертиза и сертификација, за безбедно да го спакува уредот како подготовка за транспорт надвор од локацијата пред приемот во нивниот објект во Перт. Пред уредот да ја напушти локацијата, се користеше бројач Гајгер за да се потврди присуството на капсулата во пакувањето.
Гајгеровиот бројач е електронски уред кој се користи за откривање и мерење на зрачењето.
Државните власти издадоа предупредување за радијација низ дел од Западна Австралија.
Малата, сребрена капсула, која се користи како сензор, е со дијаметар од само 6 mm и долга 8 mm.
Главниот здравствен директор на Западна Австралија, Ендрју Робертсон, истакна дека изложеноста на траги од метал е како „примање 10 рендгенски снимки за еден час, само да се стави во контекст, и количината на природно зрачење што би ја примиле за една година, само со одење наоколу“.
Пустината на државата е оддалечена и едно од најмалку населените места во земјата. Само еден од пет од населението на Западна Австралија живее надвор од Перт, главниот град на државата.
Сепак, официјалните лица велат дека се загрижени дека некој би можел да ја земе капсулата, не знаејќи што е тоа.
Робертсон истакна „доколку имате контакт или го имате блиску до вас, може да завршите со оштетување на кожата, вклучително и изгореници на кожата и ако го имате доволно долго во ваша близина, може да предизвикате она што се нарекува акутна радијациона болест, и тоа ќе потрае одреден временски период“.
Овој инцидент доаѓа додека компанијата се обидува да ја поправи својата репутација во Австралија, откако беше погодена од бурни реакции за уништување на светите карпести засолништа на Абориџините во Западна Австралија.
Рио Тинто ги уништи карпестите засолништа во клисурата Јуукан стари 46.000 години за да го прошири рудникот за железна руда.
Инцидентот предизвика голем негодување што доведе до отстапување на неколку од главните шефови на компанијата.
Во септември 2020 година, тогашниот извршен директор Жан-Себастиен Жак и други високи директори, вклучително и шефовите на одделите за железна руда и корпоративни односи, изјавија дека ќе ја напуштат компанијата.
Подготвено од А.Ѓ.
About Author
