30.01.2023 Скопје
Првиот обид за поставување семафор во светот било на 10 декември 1868 година, што е и официјален датум на поставување на првиот семафор во светот.
Првиот семафор се наоѓал во Лондон, пред британскиот парламент, работел на плин, а се состоел од два подвижни знаци прикачени на краци кои се управувале со помош на лост, и бил осветлен на врвот за да се обезбеди видливост дури и ноќе.
Светот станал подготвен за семафори дури откако струјата станала вообичаена во градовите, а градот Кливленд (Америка) ја имал честа да стане дом на првиот двобоен семафор кој работел на струја.
Во Европа, првиот семафор бил поставен во Париз во 1923 година, а потоа и во другите поголеми градови, Берлин, Милано, Рим, Лондон, Прага и Барселона.
Боите на семафорите се земени од железничкиот сообраќај. Отпрвин, железницата користела црвена боја за да означи стоп, бела за да покаже движење и зелена за да покаже претпазливост, но сепак, белата боја не се покажала како добро решение бидејќи можела лесно да се помеша со ѕвездената светлина ноќе и била заменета со жолтата боја.
Првата конвенција за унифицирање на патната сигнализација била потпишана во Женева во 1931 година. Нејзината цел била да ја зголеми безбедноста на патниот сообраќај и да го олесни меѓународното движење по патиштата со единствена сигнализација. Поголемиот дел од знаците што денеска ги гледаме на улиците биле одредени со тој договор, а семафорите со три бои (црвена, жолта, зелена) станале стандардни во целиот свет.
Подготвено од М.Н.
About Author
