10.01.2023 Скопје
Премиерот Андреј Пленковиќ рече дека неговата влада има „арсенал алатки“ за да ги казни оние што ги зголемија цените откако земјата го усвои еврото минатата недела и рече дека „имаат време до петок“ да ги вратат цените на претходните нивоа.
Цените во најновата членка на еврозоната постојано се зголемуваа во 2022 година, бидејќи инфлацијата достигна двоцифрена вредност, поттикната пред се од енергетската криза. Но, голем број трговци на мало и даватели на услуги профитираа од усвојувањето на единствената валута на 1-ви јануари за да ги заокружат цените нагоре, што предизвика широко распространет гнев кај Хрватите, особено затоа што владата ги увери дека нема да има покачувања на цените.
Пленковиќ истакна дека на оваа задача „и пристапивме со добра волја“, но за жал, голем број компании го искористија прифаќањето на еврото како изговор за да ги зголемат цените, додавајќи дека достапните податоци не укажуваат на повисоки влезни трошоци што би ги оправдале зголемувањата.
„Нашите инспекциски службеници се на терен, имаме арсенал алатки и нема да се двоумиме да ги искористиме“, рече Пленковиќ, споменувајќи ги можните кратења на субвенциите или казнените даноци.
Гувернерот на хрватската централна банка Борис Вујчиќ истакна дека зголемувањето на цените поради еврото е неоправдано бидејќи нема потреба од тоа, објаснувајќи дека искуството на другите земји кои се приклучија на еврозоната имаат покажано дека просечниот пораст на цените во однос на еврото е помеѓу 0,2 и 0,4 отсто.
Подготвено од А.Ѓ.
About Author
