17.01.2023 Скопје
Турскиот претседател Реџеп Таип Ердоган рече дека Шведска и Финска мора да депортираат или екстрадираат до 130 „терористи“ во Турција пред турскиот парламент да ги одобри нивните кандидатури за влез во НАТО.
Двете нордиски држави аплицираа минатата година за влез во НАТО по руската инвазија на Украина, но нивните кандидатури мора да бидат одобрени од сите 30 земји-членки на НАТО. Турција и Унгарија допрва треба да ги поддржат апликациите.
Турција рече дека особено Шведска мора прво да заземе појасен став против она што го гледа како терористи, главно курдски милитанти и група која ја обвинува за обидот за пуч во 2016 година.
Ердоган во коментарот доцна во неделата, мислејќи на заедничката прес-конференција што ја одржа со шведскиот премиер Улф Кристерсон минатиот ноември, истакна „ние рековме погледнете, па ако не ни ги предадете вашите терористи, не можеме да го поминеме (одобрување на апликацијата за НАТО) низ парламентот во секој случај“, додавајќи „за ова да помине во парламентот, прво треба да ни предадете повеќе од 100, околу 130 од овие терористи“.
Финските политичари го протолкуваа барањето на Ердоган како лут одговор на инцидентот во Стокхолм минатата недела, во кој беше закачен ликот на турскиот лидер за време на, како што изгледаше, мал протест.
Финската министерка за надворешни работи Пека Хаависто истакна дека не знае за какви било нови официјални барања од Турција.
Како одговор на инцидентот во Стокхолм, Турција ја откажа планираната посета на Анкара на претседателот на шведскиот парламент, Андреас Норлен.
Претседателот на финскиот парламент, Мати Ванханен, на новинарите на заедничката прес-конференција со Норлен изјави „ние нагласуваме дека во Финска и во Шведска имаме слобода на изразување и не можеме да го контролираме“.
Исто така, во понеделникот шведскиот премиер Кристерсон рече дека неговата земја е во „добра позиција“ да обезбеди ратификација на Турција на нејзината кандидатура за НАТО.
Портпаролот на Ердоган, Ибрахим Калин, во саботата рече дека истекува времето за турскиот парламент да ги ратификува кандидатурите пред претседателските и парламентарните избори кои се очекуваат во мај.
Подготвено од А.Ѓ.
About Author
