19.01.2023 Скопје
Цементарница УСЈЕ АД Скопје целосно ги отфрла неоснованите обвинувања, чија цел е дефокусирање на јавноста.
„Во интерес на точно и вистинито информирање соопштуваме дека при вонредната контрола од страна на Државниот инспекторат за животна средина, спроведена на 3 и 4 јануари 2023 година, во присуство на инспектори од Град Скопје, потврдено е дека емисиите од производниот процес во Цементарница УСЈЕ се пониски од дозволените гранични вредности. Производниот процес во Цементарница УСЈЕ се одвива во законски определените рамки и според еколошките стандарди, а производството автоматски запира доколку филтрите не работат“.
„Покрај тоа мерењата направени на 3 и 4 јануари 2023 во кругот на Цементарница УСЈЕ, уште еднаш потврдуваат дека нема корелација помеѓу работата на Цементарницата и квалитетот на амбиентниот воздух во градот. Резултатите од мерењата на сите емисиони точки во процесот потврдуваат дека нема надминување, а концентрацијата на РМ10 честичките во амбиентниот воздух измерена во Цементарница УСЈЕ е дури и помала од други мерни места во градот Скопје и во другите градови во земјата“, истакнаа од УСЈЕ.
Од УСЈЕ исто така додадоа дека поради енергетската криза и нарушеното снабдување со природен гас, за загревање на просториите употребувале мазут што е дозволен енергенс согласно А-Интегрираната Еколошка Дозвола,и исклучиво е наменет само за загревање на просториите.
Со оглед на фактот, дека во јавноста се изнесуваат обвинувања и констатации кои не се поткрепени со факти или со докажани докази, во насока на заштита на вистината, од УСЈЕ ќе поткренат соодветна правна постапка пред надлежните органи.
Подготвено од М.Н.
About Author
