20.12.2022 Скопје
Локалните власти соопштија дека околу 100.000 руски експерти за информатичка технологија ја напуштиле својата татковина од почетокот на инвазијата на Москва врз Украина.
Рускиот министер за дигитализација Максут Шадаев на собраниска расправа изјави дека ако се погледнат двата брана на заминување, до 10 отсто од вработените во ИТ-компаниите ја напуштиле земјата и не се вратиле.
Сепак Шадаев истакна дека 80 отсто од тие луѓе сè уште се вработени во руски компании и дека е против тоа да им се забрани на овие Руси да работат од нивните сегашни локации.
Првиот бран на емиграција се случи непосредно по објавувањето војна на рускиот претседател Владимир Путин во февруари, веднаш откако нареди делумна мобилизација на резервните трупи во Русија.
ДПА пренесе дека ЕУ не им дозволи на повеќето Руси кои бегаат да влезат на нејзина територија, па затоа многумина побараа засолниште во соседните поранешни советски републики, во Русија некои од нив се нарекуваат „предавници на татковината“.
Руската Влада и парламентот дискутираат за закон со кој на иселениците ќе им се забрани да продолжат да работат за руски компании. Владата во Москва верува дека тоа ќе ги спречи да се издржуваат во странство. Дискусиите во моментов се водат околу тоа кои сектори треба да бидат изземени од забраната.
Недостигот од руски ИТ-експерти неодамна доведе до тоа тие и официјално да бидат ослободени од регрутирање за воена служба. Сепак, многу Руси не им веруваат на уверувањата на Кремљ и претпочитаат да се држат настрана од својата татковина.
Подготвено од А.Ѓ.
About Author
