20.12.2022 Скопје
Денеска во Собранието на Република Северна Македонија, министерот за образование и наука Јетон Шаќири е на средба со претставници на студентските организации и здруженија на која се дискутира за подобрување на законското решение кое предвидува доделување на средства за субвенциониран студентски оброк.
Шаќири на состанокот истакна дека мерката субвенциониран студентски оброк не само што ќе биде достапна и во иднина, туку во меѓувреме законското решение ќе го унапредат согласно потребите и барањата на оние за кои се однесува. Воедно, истакна дека имаат дадено ветување и токму денеска на средбата со студентите презентираат предлог измени кои ги имаат подготвено и очекува од нив, да дадат дополнителни сугестии за да се дојде до решение кое ќе биде најправедно и вистинска поддршка при студирањето.
Измените, како што образложи Шаќири, се однесуваат на повеќе сегменти на законот.
Студентите ова право ќе го користат од понеделник до петок, без ограничување на часовите. Исклучок е периодот од 1 јули до 14 септември кога корисниците немаат право на добивање паричен надоместок, како и во неработните денови и државни празници. Дополнително, се предлага непотрошените дневни средства да не се префрлаат за трошење следниот ден.
Во иднина посебно одделение во МОН ќе работи исклучиво на прибирање и обработка на податоците и на остварувањето на правото на субвенциониран студентски оброк. Понатаму, ќе се дефинираат носителите на платен промет, односно тоа се банките со кои МОН ќе склучи нефинансиски договори за обезбедување соодветен број на картички за користење на субвенциониран студентски оброк и нивна персонализација, додека сметките на студентите би се воделе без надомест, а провизијата за трансакциите ќе ја плаќаат трговците.
Како даватели на услуги, се одредуваат исклучиво правни лица кои произведуваат, подготвуваат или продаваат храна и се регистрирани во мрежата за трговци со соодветен код и истите ќе бидат евидентирани во регистар кој ќе го води МОН, а ќе биде јавно објавен на веб страницата на министерството и ќе се ажурира на месечно ниво.
Шаќири очекува конструктивни предлози од студентите до утврдување на најдобрата верзија на законот и со тоа, како што рече, министерството заедно со Владата само уште повеќе ја проширува праксата на заедничка соработка во креирањето на политиките.
Подготвено од А.Ѓ.
About Author
