21.12.2022 Скопје
Банката на Англија го претстави новиот изглед на банкнотите со ликот на кралот Чарлс.
Портретот ќе биде единствената промена на постоечките дизајни од банкноти од 5, 10, 20 и 50 фунти и ќе почне да се пушта во оптек од средината на 2024 година.
Новите банкноти ќе го прикажуваат портретот на кралот на предната страна и на проѕирниот безбедносен прозорец.
Моменталните банкноти сè уште ќе бидат прифатени во продавниците се додека не почнат новите банкноти да циркулираат.
Кралицата Елизабета беше првиот и единствен монарх што се појави на циркулирачките банкноти на Банката на Англија, почнувајќи од 1960 година. Банкнотите издадени од шкотските и северноирските банки не го прикажуваат монархот.
Во моментов во оптек се околу 4,5 милијарди поединечни банкноти на Банката на Англија во вредност од околу 80 милијарди фунти.
Банката на Англија соопшти дека, по насоките од кралското семејство, новите банкноти ќе се печатат само за да се заменат истрошените банкноти или да се задоволи зголемената побарувачка, со цел да се минимизираат еколошките и финансиските влијанија на промената.
Гувернерот на Банката на Англија, Ендрју Бејли, рече дека е „горд“ на „значајниот момент“ со новиот дизајн.
Монетите од педесет пени со ликот на кралот Чарлс III веќе се пуштени во оптек преку поштите низ целата земја.
Се проценува дека 4,9 милиони од новите монети се дистрибуираат до пошти, околу половина од вкупниот број наменет за оптек, за да им се дадат како кусур на клиентите.
Монетите со ликот на покојната кралица сепак ќе бидат прифатени во продавниците, на ист начин како и банкнотите.
За секој што учествува во семеен божиќен квиз оваа година, вреди да се запамети дека, во растечки редослед, на задната страна на тековните полимерни банкноти на Банката на Англија се наоѓаат Сер Винстон Черчил, Џејн Остин, ЏМВ Тарнер и Алан Туринг.
Употребата на готовина стана многу поретка во споредба со дебитните картички, што се должи првенствено на употребата на бесконтактни плаќања, а потоа забрзана од пандемијата на Ковид. Куповната моќ на одредени монети и банкноти, исто така, е намалена поради зголемените цени.
Сепак, сè уште постои голем интерес од потрошувачите и колекционерите за сликите што се користат на готовината.
Колекционерите ќе бидат особено возбудени кога ќе ги добијат најниските сериски броеви на новите банкноти на кралот Чарлс кога ќе се појават.
Подготвено од А.Ѓ.
About Author
