30.12.2022 Скопје
Машките студенти и професори во Авганистан се приклучија на повиците да им се дозволи на жените да се вратат во училниците откако талибанската администрација им забрани да одат на универзитети и да работат за невладини организации.
Одлуките, кои беа објавени одделно минатата недела, добија светска осуда, при што многу меѓународни хуманитарни групи ја прекинаа виталната работа во земјата опустошена од децении војна, суша и сиромаштија.
На социјалните мрежи се објавени видеа на кои се гледа како машките студенти го напуштаат испитот во знак на протест, а исто така, кружат извештаи за отказ на професори од многу универзитети поради забраната.
Универзитетскиот професор Исмаил Машал ги искина своите академски сертификати во живо на каналот за вести во Кабул. Воедно, образложи дека ги кине неговите дипломи затоа што ако не дозволуваат жените да учат, тој нема да предава.
Министерот за образование на Талибанците рече дека жените се забранети затоа што не го почитуваат кодексот на облекување или немаат легитимни машки придружници.
Една студентка, која побара да остане анонимна, денот на забраната го нарече „горчлив и болен“.
Други студенти објавија пораки на социјалните мрежи под хаштагот #AllOrNone.
Една жена држеше натпис на кој се опишуваат болката и солзите од отфрлањето пред портите на универзитетот.
Авганистанскиот политички аналитичар Ирфан Јар рече дека новите забрани за женското образование и ограничувањата за работа ќе резултираат во „похаотична ситуација со повеќе темнина и незнаење“.
Откако талибанците ја презедоа власта минатата година, жените и девојките постепено беа ограничени од јавниот живот.
Ним им беа забранети средните училишта, парковите, спортските сали и повеќето работни места, и покрај раните ветувања дека ќе им се дозволи на жените да ги остварат своите права според шеријатскиот закон, вклучително и одење на работа и студирање.
На жените им било наредено да носат облека од глава до пети и не смееле да патуваат без машки роднина.
Во меѓувреме, Јар рече дека зголемените ограничувања би можеле „да го отворат патот за внатрешен бунт против Талибанците“. Тој рече дека додека на почетокот „огромен сегмент“ од населението ги поддржуваше Талибанците против поранешната авганистанска влада, нивната сè построга и строга политика ја намалува нивната поддршка кај народот.
Во текот на изминатата недела, најмалку четири големи глобални групи за помош ги прекинаа своите операции бидејќи не беа во можност да ги водат своите програми без женски персонал.
Координаторот на ОН за помош во Авганистан, Рамиз Алакбаров, на прес-конференција во Њујорк изјави дека и некои програми на ОН се „привремено“ стопирани. Тој истакна дека жените сочинуваат околу 30 отсто од хуманитарните работници и дека нема да биде можно да се обезбеди помош без нив.
Податоците на ОН покажуваат дека на две третини од авганистанското население им е потребна помош за да преживее, 20 милиони луѓе се соочуваат со акутен глад, а 97 отсто од Авганистанците живеат во сиромаштија.
Намалувањето на помошта и способноста да се допре до најранливите ќе има непосредни, страшни последици, додека, за многу семејства, приходот на жената бил од клучно значење за нивниот опстанок.
Подготвено од А.Ѓ.
About Author
