07.12.2022 Скопје
Податоците на лондонската компанија „Атомико”, што врши проценки на ризиците во капиталот, покажуваат дека европската технолошка индустрија оваа година загубила повеќе од 400 милијарди долари.
„Атомико”, во денешниот објавен годишен извештај „Состојбата на технологијата во Европа”, соопштува дека вкупната вредност на сите јавни и приватни европски технолошки фирми падна на 2,7 трилиони долари од 3,1 трилиони долари на крајот на 2021 година.
Федералните резерви и другите централни банки ги зголемуваат клучните каматни стапки и ги намалуваат стимулациите од ерата на пандемијата, за да ја зауздаат растечката инфлација. Тоа ги поттикна инвеститорите да ги преиспитаат своите позиции во технолошките компании што генерираат загуби.
Одредени технолошки фирми во Европа претрпеа остар пад на пазарната вредност.
Се проценува дека оваа година вкупното финансирање на европските стартапи ќе падне на 85 милијарди долари, посочува извештајот на „Атомико” изготвен врз основа на квантитативни податоци и анкети во 41 земја. Тоа е за 18 проценти помалку од повеќе од стоте милијарди долари собрани од европските стартапи во 2021 година.
Подготвено од А.Ѓ.
About Author
