12.12.2022 Скопје
Проектот за изградба на нов подморски далновод кој ќе пренесува чиста енергија од Тунис до Италија доби зелено светло од Европската комисија.
Министерството за животна средина и енергетска безбедност соопшти дека ова е „одлучувачки“ чекор кон правење на јужна Италија „енергетски центар“ во Европа, што ќе ја зајакне енергетската безбедност на континентот.
По избувнувањето на војната во Украина, енергетската криза е најитниот предизвик за ЕУ, која работи на заеднички решенија за остварлива алтернатива на рускиот гас.
Медитеранскиот енергетски центар, промовиран од италијанската влада, ќе и гарантира на Европа чист проток на енергија, главно соларна, од 600 MW директна струја.
Подморницата ќе биде изградена од Terna Spa и STEG Tunisie и ќе се движи од полуостровот Кејп Бон во Тунис до електричната станица Партана во провинцијата Трапани, Сицилија.
Во Партана веќе постои електрична станица, но ќе биде изградена нова за претворање од еднонасочна во наизменична струја. Терна уверува дека новата станица ќе биде изградена „со архитектура и бои во хармонија со пејзажот и опкружена со природна бариера од дрвја“.
Од италијанската компанија истакнуваат дека вниманието на територијата и животната средина е цврста точка за Терна, а овој проект ги комбинира техничките решенија со најмало можно влијание.
„Тунита“, далноводот што ќе носи енергија од Тунис во Италија, е вклучен во листата на проекти од заеднички интерес (PCI) и ќе вреди 850 милиони евра, од кои 307 милиони евра ќе бидат кофинансирани од Комисијата преку „Поврзување на Европа“ (CEF), фонд на ЕУ наменет за развој на проекти за надградба на енергетската инфраструктура на ЕУ.
Извршниот директор на Терна, Стефано Донарума, истакна дека подводниот енергетски мост, долг повеќе од 200 километри, ќе може значително да придонесе за енергетската независност, безбедноста на системот за електрична енергија и развојот на обновливите извори на енергија.
Ова е првпат средствата на ЦЕФ да се користат за интерконтинентална инфраструктура, која енергетски поврзува земја на ЕУ со земја која не е членка на ЕУ.
Донарума додаде дека тоа е можност Италија да стане енергетски центар на Медитеранот.
Премиерката Џорџија Мелони изјави дека тоа е голем италијански успех, а додаде и дека во судбината на Италија е да стане нов енергетски центар за целиот европски континент и нивната мисија е да ја интензивираат соработката со Африка за да донесат инвестиции и развој.
Подготвено од А.Ѓ.
About Author
