02.12.2022 Скопје
Агенцијата на ОН за храна и земјоделство ФАО соопшти дека цените на храната останаа речиси непроменети во ноември, бидејќи падот на цените на житарките, млекото и млечните производи го неутрализираше поскапувањето на маслодајните семиња и шеќерот.
Индексот на цените на ФАО на кошничката основни прехранбени производи во ноември во просек изнесуваше 135,7 поени и е за 0,2 поени понизок од октомври.
Цените се, исто така, речиси еднакви на нивото од ноември 2021 година.
Во ноември најмногу паднале цените на житарките – за 1,3 отсто во однос на октомври, а потоа млекото и млечните производи, со пониски цени за 1,2 отсто. Пченицата и пченката поевтинија за 2,8, односно 1,7 отсто во однос на октомври, делумно благодарение на продолжувањето на договорот за извоз од црноморскиот регион.
Послабата побарувачка на путер, обезмастено и полномасно млеко во прав влијаеше на цените на млекото и млечните производи. Поевтини и месото, и тоа за 0,9 отсто.
Подготвено од А.Ѓ.
About Author
