01.11.2022 Скопје
Денеска, во Клубот на пратеници во Скопје се одржа националниот состанок за „Унапредување на физичката активност на работно место“, организиран во соработка со Факултетот за физичко образование, спорт и здравје и Институтот за медицина на труд – Колаборативен центар на СЗО, со поддршка од Канцеларијата на Светската здравствена организација (СЗО) во Скопје.
Д-р Ане Јохансен, шефица на Канцеларијата на СЗО во Република Северна Македонија, истакна дека од направените проценки во 2019 година во Република Северна Македонија, населението загубило 5 000 години живот поради „седечкиот начин на живеење“. Воедно, додаде дека ова придонесува за пораст на заразни болести, болести на срцето, разни видови на рак, дијабет и е фактор на ризик за загуба на меморијата и алцхајмерова болест.
Јохансен посочи на развивањето на информатичките и другите технологии, кои резултираат со пасивност во работата и функционирањето на поединецот и придонесуваат кон тоа да не се движиме до точка што претставува проблем.
Проф. д-р Ленче Алексовска, деканка на Факултетот за физичка култура, образование, спорт и здравје, истакна дека ова е знак оти имаме добар почеток и според неа, спортот значи обединување, а физичката активност значи социјализација.
На настанот беа презентирани досегашните активности со осврт на истражувачки податоци, добри практики и национален напредок во однос на политиките за унапредување на физичката активност на национално ниво, како и подготвените препораки до работодавачите и креаторите на политики во однос на усвојување на иницијативи за активни работни места и дискусија за понатамошна соработка и имплементација на препораките од експертската група.
Подготвено од А.Ѓ.
About Author
