09.11.2022 Скопје
Во Извештајот на истражниот комитет на Европскиот парламент се заклучува дека употребата на шпионскиот сотвер „Пегаз“ очигледно била широко распространета во земјите на ЕУ.
Заклучокот од објавениот нацрт-извештај е дека владите на членки на ЕУ го користеле овој софтвер против граѓаните за политички цели, а се наведува и дека постојат индиции дека тоа го сториле Полска, Унгарија, Грција, Кипар и Шпанија.
Австрија е исто така критикувана, бидејќи поранешниот австриски канцелар Себастијан Курц има блиски врски со сопственикот на израелската компанија НСО, која го разви „Пегаз“.
Во извештајот, исто така, се наведува и дека седиштето на компанијата DSIRF, која важи за провајдер на софтвер за шпионажа, се наоѓа во Австрија, а високи функционери на таа компанија имаат контакти со Русија и Кремљ.
Во јули, Мајкрософт соопшти дека DSIRF разви софтвер наречен „Subzero” кој користи таканаречени Zero-Day-Exploits за да добие пристап до доверливи податоци и лозинки.
Надлежната известувачка на Европскиот парламент, Холанѓанката Софи ин т Велд, истакна дека развојот на „спајвер“ во земјите-членки на ЕУ е голема закана за демократијата на целиот континент. Исто така, според неа, „спајверот“ не само што ги нарушува правата на приватната сфера, туку ги поткопува демократските институции и ги замолчува опозицијата и критичарите и таквиот софтвер има застрашувачки ефект врз слободата на печатот и граѓанското општество и служи за влијание врз изборите.
Подготвено од А.Ѓ.
About Author
