06.11.2022 Скопје
Веб-страната „World Population Review“ објави податоци за просечната потрошувачка на алкохол во светот, а тоа варира од земја до земја поради културата, законите и други фактори.
Светската здравствена организација забележала потрошувачка на алкохол во секоја земја во литри чист алкохол за пиво, вино, жестоки пијалоци и други алкохолни пијалоци. Просечната светска потрошувачка е 6,18 литри, со исклучително висока концентрација на поголема консумација во Европа.
ТОП 10 земји со најголема потрошувачка на алкохол, во литри чист алкохол по глава на жител, се Чешка (14,26), Летонија (13,19), Молдавија (12,85), Германија (12,79), Литванија (12,78), Ирска (12,75), Шпанија (12,67), Уганда (12,48), Бугарија (12,46) и Луксембург (12,45).
Забележливо е дека најголем дел станува збор за европски држави.
Податоците покажуваат дека во Република Северна Македонија се пијат просечно по 6,43 литри по годишно по глава на жител. Според оваа статистика, мажите во Република Северна Македонија пијат 10,36 литри наспроти жените кои пијат 2,54 литри.
Од земјите во регионот, повеќе алкохол се пие во Црна Гора (12,24), Словенија (12,11), Грција (10,5), Србија (8,85), Хрватска (8,73), Босна и Херцеговина (7,81) и Албанија (6,82).
Во светот најмалку, односно воопшто не се пие алкохол во Сомалија, Бангладеш, Кувајт, Мавританија и Саудиска Арабија.
Подготвено од А.Ѓ.
About Author
