22.11.2022 Скопје
Вчеравечер, лидерите на владејачката коалиција во Романија најавија дека сите пензии од 1 јануари 2023 година ќе бидат зголемени за 12,5 отсто.
Претседателот на Социјалдемократската партија, Марсел Чолаку, најави дека од 1 јануари сите пензии ќе бидат зголемени за 12,5 проценти, а исто така ќе продолжи и помошта за лицата кои примаат пензии под 3.000 леи.
Според Чолаку, пензионерите кои земаат 1.000 леи ќе имаат помош од 1.500 леи, додека тие што добиваат пензија од 800 леи ќе добијат 2.000 леи, а тие со пензија од 600 леи ќе добијат помош од 3.000 леи. Воедно, истакна дека оваа помош ќе биде поделена на две транши во текот на 2023 година.
Чолаку додаде дека ќе биде доделена помош од 1.400 леи, поделени во две шестмесечни транши, за плаќање на сметките за енергија на пензионерите над 60 години кои имаат пензии помали од 2.000 леи. Покрај тоа, лицата со приходи до 1.700 леи ќе добиваат ваучери за храна во вредност од 250 леи еднаш на секои два месеци во текот на 2023 година. Предвидена е помош и за лицата со попреченост. Во исто време ќе се ажурира со нивото на инфлација додатокот за бранителите и вдовици, бенифиции што беа замрзнати од 2018 година, а зголемувањето е за околу 30 отсто. Од 1 јануари 2023 година државниот детски додаток ќе се индексира на ниво на инфлација.
Најавата за планираните мерки ја потврди и премиерот Николае Чука, кој е лидер на Национал-либералната партија.
Подготвено од А.Ѓ.
About Author
