04.11.2022 Скопје
Обединетото Кралство ги крена каматните стапки од сегашните 2,25 отсто на дури три отсто, што е најголем скок на каматните стапки од 1989 година.
Би-би-си јави дека со ваквиот потег на банката на Англија, цената на заемите се качи на највисоко ниво од кризата во 2008 година, кога банкарскиот систем во Велика Британија се соочи со целосен колапс.
Ова рекордно зголемување на каматните стапки почна уште во декември, кога трошоците за живот во Обединетото Кралство почнаа забрзано да растат и на многу домаќинства во земјата им беше тешко да ги покријат основните трошоци.
Рецесија е кога најмалку два квартали по ред во една земја има пад во економијата. Во периодот на рецесија, типично е компаниите да заработуваат помалку, што се одразува на платите кои се намалуваат, а како резултат на тоа се зголемува невработеноста.
Банка на Англија верува дека Обединетото Кралство уште од летово почна да влегува во рецесија и предвидува дека таа ќе продолжи и во текот на оваа година и првата половина на 2024 година, кога треба да се одржат општите избори.
Иако ова не е најголемиот економски пад во ОК, тоа би можело да биде најдолгиот од 1920-тите, кога рецесијата го зафати целиот свет.
Џереми Хант, британскиот министер за финансии, истакна дека инфлацијата има големо влијание врз семејствата, пензионерите и бизнисите, така што приоритет на владата е да ја ублажи што е можно повеќе, додавајќи дека каматните стапки растат насекаде низ светот, додека земјите се обидуваат да се справат со цените кои почнаа драстично да растат поради пандемијата и руската инвазија на Украина.
Зголемувањето на трошоците за живот е највисоко во последните 40 години, а од септември досега цените се зголемени за 10,1 отсто.
Банка на Англија смета дека зголемувањето на каматните стапки ќе ги поттикне луѓето да штедат и да земаат помалку заеми, што ќе го намали притисокот врз цените.
Подготвено од А.Ѓ.
About Author
