15.11.2022 Скопје
Денеска, Министерството за внатрешни работи и Републичкиот совет за безбедност во сообраќајот на патиштата во Скопје реализираа активности од зимската кампања „Користи зимска опрема“ со цел потсетување на возачите на законската обврска за задолжително носење на зимска опрема во периодот од 15 ноември до 15 март следната година, како и потребата од зимска проверка на возилата.
Претседателката на РСБСП, Гордана Кожуваровска, апелираше брзината да се прилагоди според условите на патот, да се почитува растојанието меѓу возилата, да се избегнува нагло сопирање на возилото и задолжително да се носи зимска опрема
Кожуваровска истакна дека овој временски период се карактеризира со влажни и лизгави коловози и присуство на магла и токму поради тоа секоја возач треба да биде одговорен и подготвен за безбедно возење во зимски услови. Воедно, додаде дека според истражувањата, утврдено е дека густата магла предизвикува намалена видливост кај возачите заради што на возачите им треба 75% повеќе време за да забележат опасност. Додека пак, во услови на дожд забавувањето на реакциите на возачите е за 30%, а во услови на врнежи од снег забавувањето на реакциите е за 34% и токму поради тоа Републичкиот совет за безбедност на сообраќајот на патиштата апелира до учесниците во сообраќајот да бидат внимателни, да се придржуваат до советите за управување со возилото во зимски услови, да ги следат информациите за временските услови на патиштата, како и патната сигнализација заради осигурување на поголема безбедност во сообраќајот.
Помошникот на министерот за односи со јавност на МВР, Тони Ангеловски, потсети дека од денеска (15 ноември) стапува на сила законската обврска во возилата задолжително да се носи зимска опрема, обврска која важи до 15 март следната година. Исто така, упати апел до граѓаните да се придржуваат кон законската обврска за поседување на зимска опрема, бидејќи така се овозможува непречено и безбедно одвивање на сообраќајот на патиштата во зимски услови, потенцирајќи дека поседувањето на зимска опрема е пред се поради лична безбедност, а со тоа се избегнува и било каква непријатност во случај на лоши временски услови.
Подготвено од А.Ѓ.
About Author
